Tysklandimi saassussisoqarnera inunnit 2200-nit nittartakkakkut isiginnaarneqartoq
Videolianik aallakaatitsisarfiup Twitchip, Amazonimit pigineqartup nittartagartik saassussinermik siammarteriffittut atorneqarnera ilungersunartumik tiguaa.
Tyskit illoqarfianni Hallemi saassussisoqarmat marluk toqutaapput marlullu ikilerneqarlutik.
Allattoq Ritzau
oktobarip 10-at 2019 09:29
Nittartakkani piginnittut nunarsuarmi atugaanerpaat ilaasa, attaveqatigiittarfinni peqqarniisaarnerit saassussisarnerillu takutineqartarnerisa annikillisinneqarnissaanik nutaamik iliuuseqaraluartut, Tysklandimi juutit naalagiartarfiata eqqaani saassussisoqarmat inuit marluk toqutaanneranni, saassussineq toqqaannartumik takutinneqarsimavoq.
Angutip saassissup saassussinini nittartakkakkut Twitchikkut aallakkaatissimavaa, nittartagaq taanna Amazonimit pigineqarpoq.
Angutip saassussisup toqqaannartumik aallakaatitsinera nittartakkamit peerneqannginnerani inunnit 2200-it missaanniittunit isiginnaarneqarpoq. Twitch taama nalunaarpoq.
