Inuit marluk Tysklandimi juutit naalagiartarfiata siorngani aallaaneqarlutik toqutaasut

Tysklandip kangiani illoqarfimmi Hallemi aallaasersortoqarmat inuit marluk aallaaneqarlutik toqutaapput. Politiit ilisimatitsissutigaat inuk ataaseq tigusaasimasoq.

- Inuk ataaseq tigusaraarput. Hallemi aallaasersorfioqqammersup eqqaa isumannaatsuuleqqinnissaa qulakkeerumallugu najuunnitsigut upalungaarsimajuarsinnarpugut, Hallemi politiit Twitterikkut taama allapput.

Politeerpassuit aallaasersorfioqqammersup eqqaani upalungaarsimallutillu aallaasersoqataasorineqartut allat ujartorpaat.

- Maannamut paasisat naapertorlugit Hallemi inuit toqutaasut marluupput. Aallaasersortut arlaleriarlutik igissimapput. Aallaasersoqataasorineqartut biilerlutik qimaasimapput.

- Ulapaartorujussuuvugut innuttaasullu isersimaannarnissaannut kajumissaarpagut, Hallemi politiit Twitterikkut Tysklandimi nalunaaqutaq malillugu 13.20-p missaani taama allapput.

Aviisip Bildip ilanngutassiaani allassimasut naapertorlugit Hallemi juutit naalagiartarfiata siorngani aallaasersortoqarpoq. Aallaasersortoqarnerata saniatigut qaartartoq igeriuttagaq juutit iliveqarfiannut miloriunneqarsimasoq aviisi Bild allaaserisaqarpoq.

Deutsche Bahn Twitterikkut allappoq, Hallemi qimuttuitsut unittarfiat assersorneqarsimasoq.

Reutersip allaaserisaani allassimasut naapertorlugit tyskit aviisianni Focus Magazinemi allassimavoq Hallemi aallaasersortoqareersorlu Landsbergimi Hallep eqqaani inissisimasumi arlaleriarluni igittoqaqqissimasoq. Oqaaseqartitaasoq nutaarsiassaqartitsivimmut dpamut taama aamma nalunaaruteqarpoq.

Tyskit nutaarsiassaqartitsiviata dpap ullumi siusinnerusukkut allaaserisaani allassimasut naapertorlugit tyskit kalerrisaariviat Katwarn sms-ikkut ima mianersoqqussuteqaqattaarpoq:

- Angerlarsimaffinniiginnaqquneqarputit, igalaat matullu eqqaanniissanngilatit isumannatsumiillutillu.

Juutiussusermi ulloq illernarnerpaaq, Yom Kippur, ulloq naallugu iisinnginniarfiusartoq pingasunngornikkut pisarpoq.

Hallemi politiit tyskit nutaarsiassaqartitsiviannut Der Spiegelimut uppernarsarsimavaat angut arnarlu toqutaasimasut.