Haley-p Trump USA-mi illoqarfeeqqami ajugaaffigilluaraa
USA-mi republikanerit præsidentinngorniunnissamut sassartitassaminnik USA-mi naalagaaffimmi New Hampshiremi marlunngornermi qinersipput, kina præsidentimut ukioq manna novembarimi qinersinissamut sassartinniarneritsik republikanerit qinersillutik.
New Hampshiremi Dixville Notchimi innuttaasut siulliullutik tassani qinersipput. Dixville Notch qinersisinnaatitaasunik arfinilinnik nalunaarsuisimavoq, Nikki Haleylu tassani qinigaanerpaalluni.
TV2 taama allappoq.
Naalagaaffimmi Iowami republikanerit præsidentinngorniunnissamut sassartitassaminnik sapaatit akunnerata siuliani qinersipput, præsidentiusimasorlu Donald Trump tassani ajugaalluarluni.
New Hampshiremi republikanerit marlunngornermi qinersinermi marlunngorlutik avittussanngunnguatsiarput: Trumpimik tapersersuisunut, Trumpimullu akerliusunut.
Republikanerit sinnerlugit præsidentimut sassartut sapaatiummat ikilipput, Floridammi guvernøriata Ron DeSantisip præsidentinngorniunnissamit tunuarniuteqarnini tassani nalunaarutigimmagu. DeSantisip Trumpimik tapersersuinini aamma nalunaarutigaa.
Trump Nikki Haleymut naleqqiullugu tapersersorteqangaatsiarnerusoq, inunnik isumasiuinerit takutippaat.
Trump eqqartuussivitsigut unnerluussutinik assigiinngitsunik 91-inik unnerluutigineqaraluarluni, Nikki Haleyp New Hampshiremi qinersiseqarluarsinnaanissaa ilimagineqarsinnaanngilaq, Haleylu republikanerini tapersersorteqarluarniaruni sukataartariaqassaaq, aamma naalagaaffinni allani siunissami qaninnermi qinersisoqalerpat.
New Hampshiremi qinersinermi inernerit kingulliit marlunngornerup pingasunngornerullu akornanni unnuami saqqummiunneqarsinnaanissaat ilimanartoq, TV2 nutaarsiassaqartitsiviup AP-p allaaserisaa naapertorlugu aamma allappoq.
