Guyanami politiit: Atuartoq mobilimik arsaarneqarami ikuallatsitsisimassangatipparput

Amerika Kujallermi illoqarfiit ilaanni Guyanami atuarfik nerisarfiullunilu ineqarfiusoq sapaatip akunnerata naanerani ikuallarujussuarmat meeqqat 19-t ikuallagussaallutik ajunaarput, maannalu arnaq ikuallatitsisimassangatinneqartoq politiiniit pasineqalerpoq.

Taama politiit nutaarsiassaqartitsivimmut Reutersimut ippassaq marlunngornermi ilisimatitsisimapput.

Niviarsiaq pineqartoq atuarfiup aqutsisuanit ilinniartitsisumiillu mobilimik arsaarneqarsimavoq, ikuallannermullu tamanna patsisaassangatinneqarpoq.

Taamatuttaaq nalunngittut ilaata kinaanerminik isertuusserusuttup oqaatigisimavaa, niviarsissap taassuma ulloq sioqqullugu unnukkut atuarfimmik tassannga ikuallatitsiniarluni oqaaseqarsimasoq.

Ilisimannittoq naapertorlugu, niviaaluk taanna ilinniartut paarlaaqatigiissimatsiaannartut uffarfiliarsimavoq sullinernullu seqqertaammik saagut seqqartarsimavai innermillu kukullugit.

Taamatuttaaq tusarfiit tutsuiginartut oqaatigaat, niviaaluk ikuallatsitsisimanerarluni nassuersimasoq.

Atuarfimmi ineqarfiutigisumi niviarsiaqqat aqqanilinniit aqqaneq-marlunnik ukiullit aammalu angajulliunerumaat 16-iniit 17-inut ukiullit najugaqartuusimapput.

Ajunaartullu nukarlersaat nukappiaraasimavoq tallimaannarnik ukiulik taannalu atuarfimmi sulisup erneraa, ajunaartullu sinneri tamarmik niviarsiaraasimapput.

Allallu 20-t peqqamik annattut napparsimavimmi uninngasut taakkunannga marluk inuunerminni maanna nalorninartumiittut, Reuters allappoq.