ASSIT GUX-mi ilinniarnertuunngortut ingerlaaqatigiittut
Ilinniarnertuunngorniat GUX-imi ilinniartut ulluni makkunani soraarummeerlutik naammassinerinut atatillugu, ilinniartitaanermut naalakkersuisoq - Nivi Olsen - marlunnik nutaanik nersornaasiivoq.
Nersornaasiinikkut ilinniarfiit aamma inuusuttut ilinniagaqarniarlutik aalajangersimasut nersorniarneqartassapput.
GUX Nuuk, ilinniartut ulluinnarni ilinniartitsinermut takkuttarnissaannik kajumissaasarnermini kaammattuisarnerminilu nersornaammik “Ilinniartunik amerlanernik takkutsitsisarneq”-mik taaguutilimmik nersornaaserneqarpoq. Tassani KTI-p ilinniarnertuunngorniarfia normu 2-tut inissippoq.
KTI tassaavoq Kalaallit Nunaanni Teknikimik Ilinniarfik. Tassanilu pineqarlutik Saviminilerinermik Ilinniarfik, Sanaartornermik Ilinniarfik, Aatsitassarsiornermut Ilinniarfik aamma ilinniarnertuunngorniarneq.
Nuummi ilinniarnertuunngorniarfik GUX Nuuk nersornaammik “Ilinniartunik amerlanernik naammassinnitsitsineq”-mik taaguutilimmik nersornaaserneqarpoq, Campus Kujallermi ilinniarnertuunngorniarfimmit unammillerneqarluarluni. Tamatumani ilinniarnertuunngorniarfik ilinniartunik amerlanerpaanik naammassinnitsitsisoq nersornaaserneqarpoq.
- Ilinniarnertuunngorniarfiit unammilleqatigeeqaat, nersornaasiisarneq siunissami ingerlaannassasoq neriuppunga, ilinniarfiit pingaarutilimmik inissisimanerat taamaalilluni isiginiarneqalerlunilu paasineqassammat. GUX ilinniartunik siullernik naammassisitsinissinni pilluaritsi - neriuppunga amerlanerit siunissami nalliuttorsiutigisassagivut, Nivi Olsen tusagassiuutinut nalunaarummini taama allappoq.
