GUX-ertut Arnat Ulluat pillugu: Naligiinnerusussaagaluarpugut

GUX-imi Nuummi ulloqeqqasiuleruttorput. Nerisarfik inuaqerpalaarpoq, nerrivinnilu ammalortuni qaqortuni ilinniartut eqimattakkaarlutik issiapput, inersuarlu nerisarfiusoq pølsehornersunnialaarlunilu pastasunnippoq.

Melanie Fjordside, Fiona Ostermann, Tullerunnaq Rasmussen aamma Sandie Olsen nerriviit ilaannut ingeqqammerput.

Tamarmik ukiut pingajussaa ilinniartuugamik, taamatut ulloqeqqasioqatigiittarunnaangajalerput.

Taakkulu kammagiinnertik ilinniarnertuunngorniarnertillu kisiisa assigiissutiginagit arnaanertik aamma assigiissutigaat. 

Ullumikkullu marsip arfineq-pingajuat Arnat Ulloraat. Taamaammallu sapaatit akunnerata ingerlanerani KNR-imiit GUX-iliarpugut Kalaallit Nunaanni naligiissitaaneq suiassuserlu pillugit ilinniartunik oqaloqateqariartorluta. 

Arnat sapinngillat

- Soqutigineqarpallaarunanngilaq. 

Arnat Ulluannik nammineq ilamilu soqutiginninnerat pillugu KNR-imit aperineqarami Fiona Ostermann taama akivoq. 

Arnat Ulluat soqutigivallaanngikkaluarlugu arnat angutillu naligiissitaanerat pillugu kammagiit taakku ilaat uummammioqarput. Arlallimmi suiaassusertik pillugu immikkoortinneqartutut misigisaqarsimapput. 

- Angerlarlunga igajartoqqullunga meeqqanillu paarsiartoqqullunga arlaleriarlunga oqarfigineqartarpunga, aamma eqqartukkamut tunngassuteqanngikkarluaraangalluunniit taama oqarfigineqartarpunga, Melanie Fjordside 19-inik oqartoq nangillunilu. 

-Taamalu oqartoqaraangat suiaassuseq pineqartarunarpoq.

Sandie Olsen 18-inik ukiulik akiani issiavoq. Taassuma naligiissitaaneq ullut tamarluinnangajaasa eqqarsaatigisarpaa, pingaartumik atuanngiffimmini suligaangami.

- Suliassat ajornarnerit angutinit suliarineqarnissaat suliffinni piumanerusarpaat, oqaluttuarpoq. 

Suliassat "angutinut tulluartutut" isigineqarnerusartut tassaanerpai soorlu pallenik kivitsinerit. 

- Arnat sapertutut isigineqartarput, taanna oqarpoq. 

Sapinnginnamik?

- Aap, Sandie Olsen illariaatigaluni akivoq. 

Tullerunnaq Rasmussenip Ilinniarnertuunngorniarfik naammassiguniuk ukiualuit atuanngiffeqariarluni inatsisilerituunngorniarnissaminik eqqarsarpoq. Ilinniarfissaminik arlalinnik neqeroorfigitereerami isumannannginnini oqaluttuaraa.

- Arlallit eqqarsartarunarput suliaq unammillernartuummat arnat inatsisilerituunngorsinnanngitsut imaluunnit eqqartuussisuserisunngorsinnaangitsut, Tullerunnaq Rasmussen oqarpoq nangillunilu. 

- Amerlasuut eqqarsartarunarput angutit kisimik sapinngikkaat.

Suiaassuseq sammineqanngippallaaqaaq 

Kalaallit Nunaanni suiaassuseq pillugu taakkulu naligiinnginnerat pillugu eqqartuisoqartannginnera arnat nerrivimmi issiasut maluginiarpaat. 

- Kisianni aamma oqallinerit taakkununnga tunngasut ujartorneq ajorpakka, Melanie Fjordside oqarpoq. 

Eqqartuinermi arnat angutillu akissarsiaasa assigiinngissutaat aamma tikinneqarpoq. Naatsorsueqqissaartarfiup kisitsisaatai naapertorlugit 2022-mi  nunatsinni angutit 23 procentimik arnanit akissarsiaqarnerupput. 

Tamannalu Sandie Olsenip "naapertuilluannginnerujussuartut" isigiaa. 

- Akissarsiat assigiinngussuteqartussaanngikkaluarput. Suliarmi assigiimmik suliarineqartarpoq, taamaammat assigiinngitsumik akilersorneqarnera isumassaqartinngilara, taanna oqarpoq.

Tallimanngorneq nalinginnaasoq

Arnat Ulluata malunnartinnissaa kammagiit taakku sisamat eqqarsaatigisimanngilaat. 

Fiona Ostermannip aappani ilagissamaarpaa. Tullerunnaq Rasmusseni suliffimmini matusissaaq unnukkullu qulinut aatsaat soraasssallluni.

- Soraaruma angerlarlunga innariartussagunarpunga, tuini qullartiutigalugit taanna oqarpoq. 

Arnat Ulluata malunnartinnissaa Sandie Olsenip aamma Melanie Fjordisidep aamma ilimaginngilaat. 

Imanngitsoq malunnartitserusunnginnamik, Melanie Fjordside oqarpoq. Kisianniuna aaqqissuussanik pilersaarutinilluunniit ullormi pisussanik tusagaqarsimannginnami malunnartitsinianngitsoq.

- Sammineqalaartuaannarpoq, taamaammallu inunnit puigorneqartarunarpoq, naggasiivoq.