"Guuterput" immikkuullarissumik oqaluttuassartaqarpoq

Guuterput allanut tussiutinut sanilliunneqarsinnaanngilaq, tassami arriitsuaaqqamik nikuilluni tussiarneqartarami.

Toqqorsivimmiit tigusilluta oqaluttuassartaa tupinnartoq kalaallinullu pingaaruteqaqisoq uani ilanngutassiami oqaluttuarissavarput. 

Guuterput oqaluttuassartaa aviisiliortup Uvdloriánguak' Kristiansenip 1974-imi aallakaatitassiarisimavaa. Toqqorsivimmiillu tigusilluta ilanngutassiarivarput.

Annaassisoq inunngormat savanit paarsisut tupinnartorsuarmit inngilinit tussiarfigineqarsimanerat juulleriartornerani unnuit ilaanni Rasmus Berthelsenip eqqarsaatigivaa.

- Sulili qeqarniarlunga, uernaammersutut misigaanga. Nalaarsaarfimmullu innarlunga aanngaalaarniarlunga. Soorlu suli sinilersutut misiginanga, qulinni erinnamik tusarnerluinnartumik tusaasaqalerpunga. Nipit tulleriiaarpaluttut, tusarningaartut tusaavakka. Taallaannut allaat erseqqissumik tusaallugit.

Tassa taama tussiutip Guuterput oqaluttuassartaa aallartippoq aviisiliortup Uvdloriánguak' Kristiansenip aallakaatitassiaa malillugu.

Ajoqi, ilinniartitsisoq tussiusiortorlu Rasmus Berthelsen Sisimiuni inunngorpoq alliartorlunilu. Qatanngutimi akornini mikinersaasimavoq soqutigineqannginnersaallunilu, taamatullu ittuunerata ajukkuttunngortissimavaa.

Juulleriartornerani ukioq 1852-imi misigisaa Telef Lyngep oqaluttuaraa:

- Nipi aanngasippaluppoq sallaalluni paatsuugassaananilu. Imungalaarlu tusarnaartillugu, timiga eqqissinermit nunamiorpalunngitsumit avatangerneqarporlusooq. Sininngilanga naluarali aamma eqqumanerlunga.

Rasmus Berthelsen atuaqatimini pikkorinnersaasimavoq, kalaallinillu siullersaalluni ilinniartitsisutut ilinniagaqarsimalluni, siullersaallunilu tussiusiortunngorsimalluni. Aamma siullersaalluni tusagassiortutut sulisimavoq, Atuagagdliutinilu ukiuni 20-ni aaqqissuisuusimalluni. Inuiaqatigiinni pissutsinik sakkortuumik isornartorsiuisarsimavoq.

Unnummut saqqummerfigineqarneranut uterutta, tussiut ilisarisimalluagarput pigineqalerpoq.

Tussiut Guuterput tusaramiuk ingerlaannaq allassimallugu oqaluttuarisimavaa:

Avangnâmiok 1955-imeersoq naapertorlugu tussiutip Guuterput siulequtaasa oqaasertai "Inngilerpassuit savanik paarsisunut ima tussiarput", ajoqip Elias Gedionsenip kingusinnerusukkut ilanngussimavaa, nassuiarniarlugu inngilit Rasmus Berthelsenimut tussiarsimasut.

Tussiut Guuterput ataqqiniarlugu 1920-p 30-llu akornanni nikuilluni atorneqartalersimavoq.

KNR.gl/tv-mi "Guuterput" isiginnaarlugulu tusarnaaruk