Gustav Dalen ikiorneqarluni sikumit kaanngartinneqartoq
Umiarsuaq Ilulissat avannaanni ajortooqqasoq sikuuneranilu ingerlariaqqissinnaajunnaaqqasoq, pingasunngornermi ikiorneqarluni sikumit kaanngartinneqarsinnarluni Ilulissat tungaannut kalinneqarsinnaasimavoq.
Issittumi Sakkutooqarfiup tusagassiisartua, Camilla Schouw Broholm, Sermitsiamut taama ilisimatitsivoq.
Issittumi Sakkutooqarfik umiarsuup ajornartorsiorneranik sapaammi kalerrinneqarpoq, umiarsuarlu alapernaarsuut "Hvidbjørnen" akunnerit 15-it 16-illu akornanni angalareerluni umiarsuarmut "Gustav Daelen"-imut annguppoq.
"Hvidbjørnen"-ip "Gustav Dalen" sikumit kaanngartissinnaasimavaa Ilulissallu umiarsualiviannut kalissinnaasimallugu.
Umiarsuaq alapernaarsuut sinerissamik alapernaarsuinini kingorna nangeqqippaa, alapernaarsuinerali aamma kinguarteqqinneqarpoq, umiarsuaq alla aamma ajornartorsiortoq kalerriutigineqarami.
"Hvidbjørnen" pisup nalaanukarpoq, umiarsuullu ajornartoortup nalaani sikumik aserorterilluni umiarsuarlu ajornartoortoq ingerlaqqissinnaanngorluni.
"Hvidbjørnen"-ip alapernaarsuinini maanna nangippaa, Sisimiullu tungaannut maanna ingerlaarluni, Issittumi Sakkutooqarfiup paasissutissiisartut ilisimatitsivoq.
