GSS-imeersut nunatsinni pissartanngorniunnermi ajugaasut
Assammik arsarluni nunatsinni pissartanngorniunnermi Nuummi Inussivimmi sapaammi ingerlanneqartumi bronzennanniuttoqarlunilu finaalertoqarpoq. GSS-illu arnartai angutitaalu nunatsinni pissartanngorput.
Allattoq Mathies Hvid Toft, Bikki P. Kleist
apriilip 08-at 2019 08:33
Finalimimi angutit GSS-miut ukiut qulit ingerlatiinnarlugit ajugaapput, unamminermilu GSS-miut NÛK-mut unammigamik 32-26-mik ajugaallutik. NÛK unamminermi siullermi målemik ataatsimik siuaraluarpoq.
Angutit bronzennanniunneranni Ilulissaneersut N-48 Aasiammiunut Norsaq HC-mut unammigamik 41-24-mik isertitaqarnerungaatsiarlutik ajugaapput.
GSS-miut arnartai NÛK-mut finalerlutik unammigamik 32-16-mik ajugaapput.
Bronzennanniunnermi N-48-p arnartai, Maniitsormiunut Aqigssiaq-mut unammigamik 37-16-mik isertitaqarlutik ajugaapput.
