Greenpeace Qalasersuup imaata naqqani erfalasuliivoq
Inuusuttut sikup ataani kilometerinik sisamanik itissulimmut "siunissaq pillugu erfalasumik" kivisitsipput nunarsuullu immikkoortuata kimilluunniit pigineqannginnera suaarutigalugu.
Angalaqatigiit Inunnit marlunnik siuttuuffigineqartut sapaatit akunnerata naanerani kingullermi siku putoriarlugu erfalasoq meeqqamit Malaysiameersumit ilusilersorneqarsimasoq immap naqqanut kisivippaat.
Greenpeacemit oqaluttuarineqarpoq erfalasoq karsimut igalaaminermik titaniumimillu sanaamut pitunneqarsimasoq, taannalu inuit millionit pingasungajaat atsiornerinik imaqartoq, taakkununngalu ilaallutik isiginnaartitsisartut, nipilersortartut, eqqumiitsuliortut suliffeqarfinnilu pisortat.
Inuit taakku Greenpeacep Issittup atupilunneqannginnissaanik suliniutaanut peqataanermikkut atsiornitik Qalasersuarmukaanneqarnissaannik kissaateqarsimapput.
- Nunarsuup isorpiaanut erfalasuliiartornitsigut inuusuttunik nunarsuarmit tamaneersunik isummersuisinnaassalluta neriuutigaarput. Issittumi sumiiffiup immikkut ittup kimilluunniit pigineqannginnera nunamillu aalajangersimasumit pigineqannginnera Nunarsuarmioqatigiinnulli tamanut kingornussassanngortinneqarnissaa oqariartuutigaarput, Josefina Skerk, 26-inik ukioqartoq, Samillu sinnerlugit Sverigemi Inatsisartunut ilaasortaasoq oqarpoq.
- Uagut millionerpassuillu allat peqatigalugit atsiornivut maanna Qalasersuup imaata naqqaniilerput. Peqatigiillutalu kaammattuutigaarput sumiiffik nunarsuarmioqatigiinnit ataatsimut pigineqassasoq, uuliasioqatigiiffinnit naalakkersuinikkullu isummersornermut atorneqarani. Nunap inuii, Issittumi tamarmi najugaqartut, inuusaatsimikkut suliffeqarfissuarnit aqutassaanngitsumik piummartuunit navianartorsiortinneqalersut tapersersorpagut, oqarpoq.
Qalasersuarmut angalaneq Issittumi Siunnersuisooqatigiit qullersaasa Barneomi ilisimatuut tammaarsimaarfianni ataatsimiinnerat nalerorlugu ingerlanneqarpoq. Qalasersuarmut angalaneq aallartinneqarmat Josefina Skerkip angalaqatigiit ataatsimeeqatigiumasimagaluarpai itigartinneqarlunili, Greenpeace paasissutissiivoq.
Angalatigiit inuusuttut qamutit oqimaatsut uniarlugit ullormut kilometerinik qulinik ingerlaartarsimapput. Taamaalisinnarlutillu qulimiguulimmik Barneomeersumik qanillattuunneqarput, tassanngaanniillu sisoraaserlutik Qalasersuarmut apuussimallutik.
