Greenland Mineralsip piiaavimmik 2021-mi ammaasinnaanissani neriuutigigaa

Greenland Minerals and Energyp ukiuni marlunni arfarmilu suliaqareerluni VVM-imik VSB-millu nalunaarusiaminik nunatsinni oqartussanut tunniussinera KNR-imit septembarip aallartinnerani oqaluttuaraarput. Kuannersuarni suliniutiginiarneqartoq piviusunngortinneqassappat, tamatuma avatangiisinut inuiaqatigiinnullu sunniutissai nalunaarusiani allaaserineqarput.

Ingerlatseqatigiiffiullu nalunaarusianik marlunnik tunniussinermigut anguniakkani qanilliallaqqippaa, tassalu Kuannersuarni aatsitassanik piiaanissaq. Tamannali anguneqassappat nalunaarusiat Namminersorlutik Oqartussanit akuerineqaqqaartariaqarput.

AAMMA ATUARUK Kuannersuarni suliniut pillugu nalunaarusiat pingaarutillit GME-p tunniukkai

GME-lu siunissamut isumalluarpoq. Piiaaviummi 2021-imi ammarneqarsinnaanera periarfissaasoq Australiamiut ingerlatseqatigiiffiata nutaarsiassanik allakkiaani kingullermi allaaserineqarpoq.

- Kinami saffiugassanik qaqutigoortunik suliaqartut annerit ilaat Shenghe Resources ikiortigalugu, Greenland Mineralsip  imminut akilersinnaassutsimik misissuinerata nutarterneqarnerata ukiup tulliuttup iluani naammassinissaa, piiaaviullu 2021-mi aallartissinnaanissaa ilimagaarput.

Kuannersuarni piiaavimmi aatsitassanik ukiuni 37-ni piiaasoqarsinnaanera imminut akilersinnaassutsimik misissuinerni kingullerni oqaatigineqarpoq.

GME Kuannersuarni 2017-mili suliniuteqalerpoq, ingerlatseqatigiiffimmilu piginneqataassutit 12,5 procentii Kinamiut ingerlatseqatigiiffiannit Shenghe Resourcesimit 2016-ip naalernerani pisiarineqarlutik.

Kinamiut piginneqataalernerat oqallisaasupilussuuvoq, Kinamiut GME-mi piginneqataassutinik amerlanerusunik kingusinnerusukkut pisinissamut periarfissinneqarsimasinnaanerat isumaliutigineqarmat. GME-milli tamanna ilumuunnginnerarpaa.

AAMMA ATUARUK Shenghemik isumaqatigiissusiaq akuersissutigineqarpoq