Kuannersuarni suliniut pillugu nalunaarusiat pingaarutillit GME-p tunniukkai
Australiami nutaarsiassaqartitsivik The West Australian naapertorlugu, Kuannersuarni piiaaveqalerneratigut avatangiisinut tunngatillugu kingunerisassat pillugit VVM-imik nassuiaammik nutartikkamik GME tunniussaqarpoq. GME-milu CSR-imut pisortap Johannes Kyedip tamanna KNR-imut uppernarsarpaa:
- VVM-imik VSB-millu nalunaarusiat ukiut marluk affarlu suliarineqareerlutik maanna tunniunneqarput, Johannes Kyed oqarpoq.
CSR-imut pisortaq oqaluttuarpoq GME-p oqartussat oqaloqatigalugit nalunaarusiat marluusut ukiuni kingullerni marlunni affarmilu suliarisimagai, piiaaveqarnermilu avatangiisitigut kingunerisassat kiisalu inuiaqatigiinnut tunngatillugu kingunerisassat taakkunani nassuiarneqartut.
Nalunaarusiat 2015-imi decembarip qaammataani siullerpaamik tunniunneqartut GME-mit siornatigut ilisimatitsissutigineqarpoq, oqartussaasullu piumasaqaataat naammassiniarlugit ingerlatseqatigiiffiup kingorna sulissutigisimavaa.
- Avatangiisinut aamma inuiaqatigiinnut tunngatillugu kingunerisassat pillugit itisilerneqartariaqartut assigiinngitsuusimapput, Johannes Kyed oqarpoq.
AAMMA ATUARUK Uranimik piiaavissaq pillugu nalunaarusiaq akuersissutigineqanngitsoq
Nalunaarusiallu oqartussanit nalilersuiffigeqqinneqartussanngorput, tamatumalu kingorna tamanut ammasumik tusarniaasoqassalluni. Nalunaarusianik tunniussineq ingerlatseqatigiiffik naapertorlugu piiaanissamut akuerineqarnissamik inaarutaasumik qinnuteqaateqarnissamut alloriarneruvoq.
Saniatigooralugu uranimik piiaasoqartussaanera pissutigalugu piiaaveqarnermik suliniut innuttaasut akornanni oqallisaasupilussuuvoq.
AAMMA ATUARUK GME-p pisortaata VVM-imut missingiutip isornartorsiorneqarnera akerlileraa
