Greenland Expressip taamaatitsineri Atuisartut siunnersuisoqatigiivini ulapaartitsisut

Atuisartut siunnersuisoqatigiivi taamaatitsiinnarnerit pissutaallutik immikkut ittumik ulapputeqartut taama siunnersuuteqarput.

Timmisartortitseqatigiiffik Greenland Express Kalaallit Nunaannit Aalborgimullu aasaanerani timmisartuussinissat pilersaarutigisimasani aammaarluni kinguarteqqippai.

AAMMA ATUARUK Greenland Express kinguartitseqqittoq

Taamaattoqarpat Atuisartunut Siunnersuisooqatigiinni siunnersorti Malene Lynge ima siunnersuutissaqarpoq:

- Taava taarsiivigineqarnissamik piumasaqaat allaganngorlugu Greenland Expressimut anngunneqassaaq. Uani eqqarsaatigineqarpoq allakkatigut imaluunniit emailikkut piumasaqaat taanna anngunneqarnissaa, uppernarsaasersorsinnaanissaq pingaaruteqartorujussuussagami, Malene Lynge, timmisartuussinissat kinguartinneqarneri peqqutigalugit aasaq manna ulapeqisoq taama oqarpoq.

Saaffiginnissutillu ullut marluk pingasulluunniit Greenland Expressimit akineqanngippat, qisuariarnissat tullinnguutissaaq.

AAMMA ATUARUK Greenland Expressip aasaanerani timmisartuusseqqaarnissani kinguartippaa

- Qisuariartoqanngippat atuisartunut pisisartunullu maalaartarfimmut maalaarummik tunniussinissaq tullinnguutissaaq. Tassa piumagaanni maalaaruteqartoqarsinnaavoq uagut aqqutigaluta. Maalaarummik tunniussinissamik aqqutissat Atuisup facebookkiani nassaarineqarsinnaapput, aamma maalaarummut immersuivissat Atuisup nittartagaani Sullissivimmilu nassaarineqarsinnaapput, Malene Lynge, Atuisumi siunnersorti KNR-imut taama oqarpoq.