Greenland Energy Trumpip Kalaallit Nunaat pillugu suliniutaanut attuumassuteqanngilaq, pisortaq oqarpoq
Amerikamiut uuliasioqatigiiffiata, suna tamarmi ajunngitsumik ingerlappat, Nunap Qeqqani uuliasiornissartik oktobarimi aallartikkusuppaa.
Uuliasioqatigiiffiup qaammatini kingullerni siuariartornera Ittoqqortoormiini Nuummiillu ernumalersitsivoq.
Pingaartumik USA-p præsidentiata nunatsinnik sivitsortumik piginnikkusunnerata nalaani pimmat.
Tamanna ingerlatseqatigiiffiup Amerikamiut naalakkersuisuinut præsidentimulluunniit qanittunut attaveqarsinnaanera oqallitsitsivoq, Donald Trumpillu ikinngutaa tv-kkut aallakaatitassiortartoq Dr. Phil uuliasiornissaq pillugu piviusulersaarummi aallakaatitassiornissaminut atatillugu nunatsinnukarniarnera qanittukkut oqallitsitsingaatsiarpoq.
Inuttut soqutigisaq
Greenland Energyp pisortaata kunngeqarfimmi tusagassiuutinit apersorneqarnermini siullermi ingerlatseqatigiiffik Amerikamiut naalakkersuisuinit tapersersorneqannginnerarpaa USA-llu nunatsinni sunniuteqarnerulernissaanut tunngatillugu suliniutaannginnerarlugu.
- Trumpip atorfilittaanut tunngassuteqanngilluinnarpoq, Robert Price uuliasiornissaq pillugu KNR-imut taama oqarpoq.
Pisortap niuernikkut soqutigisani kisiisa meerarnerminiillu nunatsinnik soqutiginninnini taamaallaat aallaaviginerarpai.
Robert Pricep ataataa Sorsunnersuup Aappaata nalaani Tunup sineriaani silasiortutut aallartitaasimavoq taamaattumik taamani oqaluttuanik qaatuussaqarsimalluni uuliasiortoq oqarpoq.
Greenland Energyp uuliasiornissamut maanna suliniutaa Donald Trumpili præsidentinngunngitsoq eqqarsaatigereersimanerarpaa.
Aammattaaq ingerlatseqatigiiffik nunarsuarmit tamarmit politikkikkut assigiinngitsunik isumalinnit aningaasaliiffigineqarpoq.
Ingerlatseqatigiiffiup Trumpip atorfilittaanit politikkikkut tapersersorneqarnissamik neriorsorneqarsimannginnera suliniullu pillugu Trumpimik tapersersuisunik attaveqateqarsimannginninni Robert Pricep KNR-imut oqaatigaa.
Trumpimit suliniut?
Inuk ataaseq pinnagu: Præsidentip Kalallit Nunaannut immikkut aallartitaa, Jeff Landry, Robert Pricep ingerlatseqatigiiffiullu siulersuisuini siulittaasup Future Greenlandip maajimi ataatsimeersuartitsinerata nalaani ataatsimeeqatigisaat.
Jeff Landryp præsidenti angalanini pillugu ilisimatinniarlugu USA-mut tamatuma kingorna uterpoq, ingerlatseqatigiiffiullu Nunap Qeqqani uuliasiorniarnerat Fox Newsikkut kingusinnerusukkut oqaluttuaraa.
Robert Pricep aqutsisut immikkullu aallartitap Nuummi ataatsimeeqatigiissimanerat ataatsimeeqatigiinnermilu suliniummik eqqartuisimanerat KNR-imut ilumoornerarpaa. Jeff Landrymulli Trumpilluunniit peqatigisartagaannut allanut attaveqannginnerarpoq.
Aammattaaq ingerlatseqatigiiffiup inunnik Trumpimut Amerikallu illersornissaqarfianut qanimut attavilinnik sulilersitsisimanera, aningaasaatilissuillu præsidentimut tapersersuisut suliniummut aningaasaliisimanerat, danskit tusagassiuutaannit Danwatchimit saqqummiunneqarpoq.
TV-ikkullu aallakaatitsisartup Dr. Phil-ip, Trumpip ikinngutaasa ilaata, uuliasiorluni suliniummik nittarsaassiniarluni Kalaallit Nunaannut aasaru tikeraarnissani maanna nalunaarutigaa.
Ingerlatseqatigiiffiup aningaasaliisuisa taamatut ataqatigiittoqarneranik ilisimannippasinnerat, KNR-ip issaq saqqummiuppaa.
Taakkua Trumpip suliniummut peqataalersinnaanera ingerlatseqatigiiffiullu USA-p politikkikkut aqutsisuinut attaveqalersinnaanera eqimattanut allaqatigiittarfikkut tamanut ammasumi persuarsiutigaat.
Kalaallit Nunaannut tunngassuteqartoq - USA-muunngitsoq
Robert Pricelli ingerlatseqatigiiffiup Trumpimit suliniutaannginnera erseqqissarpaa.
Amerikami politikkikkut anguniagaqarnermi atortutut isigineqarneq ‘eqqortuunngilaq aamma ingerlatseqatigiiffiup Kalaallit Nunaataluunniit soqutigisaannut iluaqutaanngilaq’, taanna oqaluttuarpoq.
Robert Pricep aningaasaliisut qanoq oqalunnerat sunillu aningaasaliiffiginninnerat aqussinnaanagu erseqqissaatigaa.
Dr. Phil-illu præsident Trumpimut attaveqarnini toqqarneqarnerminut aalajangiisuunnginnerarpaa.
Greenland Energylu ‘Dr. Phil-ip Trumpip peqatigisartagaanut, ingerlatseqatigiiffik sinnerlugu, attaveqarsimaneranik ilisimasaqanngilaq.’
Greenland Energyp allakkatigut akissutimini, Nunap Qeqqani suliniutip Kalallit Nunaanni inatsisinut naapertuuttuunissaa suliniuteqarnissamullu kalaallit oqartussaasuinit - Washington D.C-minngaanniinngitsoq, akuersissuteqartoqarnissap piumasaqaataanera allappaa.
Ingerlatseqatigiiffiup ‘USA-mi politikererpassuarnut inuussutissarsiortorpassuarnullu attaveqarnertik, tamannalu ingerlatseqatigiiffimmut Amerikamiunik aningaasaliisulimmut nalinginnaasuunera’, ingerlatseqatigiiffiup aamma allappaa.
- Aningaasaliisut akornanni politikkikkut attaveqaatit pillugit eqqoriaasaqattaartoqarnera maluginiarparput. Tamanna suliniutini taama angitigisuni taamallu malinnaaffigineqartigisuni nalinginnaasuuvoq.
- Greenland Energylli suliniutaa Amerikamiut politikkiannit aalajangerneqassanngilaq - kalaallit oqartussaasuinit akuerineqaqqaartussaavoq, nunap qanoq innera suliniutillu niuerniutigineqaannarnissaa apeqqutaapput.
