GreenLAB Greenland A/S matuinnarpaat
Tassami suliffeqarfimmi GreenLAB Greenland A/S-imi sulineq unitsinneqarlunilu suliffeqarfiup matuneqarnissaa, siulersuisut immikkut ittumik ataatsimiinneranni aalajangerneqarpoq. GreenLAB Greenland A/S 2006-imi pilersinneqarpoq.
GreenLAB Greenland NunaMineralsimit, taamanikkut Nuup Kommuneanit, Grønlandsbankenillu Suliffimmik Aallartitsinermut Aningaasaateqarfianit pilersinneqarpoq, aatsitassalerinermi Nuummi misissuiffeqalernissaq siunertaralugu pilersinneqarluni.
Aasaaneranuisoq suliassaqartarsimasoq
- Aatsitassarsioqatigiit assigiinngitsut misissuiffik atortarsimavaat, soorlu ujaqqat ukiumoortumik unammisitsinermi Ujarassiorimmi nassaat GreenLAB Greenland A/S-ip misissuiviannit misissorneqartarsimasut, suliffeqarfimmi maanna matuneqarsimasumi siulersuisut siulittaasuat Johannes Kyed oqarpoq, nangillunilu:
- Aasaanerani suliassaqarnerusimavoq, ulapinnerpaaffimilu sulisut misissuiffimmi sisamaasarsimallutik, Johannes Kyed oqaluttuarpoq.
Siornamiillu maannamut Nunatsinni aatsitassarsiornerit killeqarsimanerat ilaatigut pissutaallutik, GreenLAB Greenland A/S-ip matuneqarnissaa piginnittut aalajangertariaqarsimavaat.
- Pigisat nalingi qaammatit pingasut arfinillillu ingerlaneranni nalilersorneqareerpata piginnittut qanoq annaasaqarsimanersut paasinarsiumaarpoq, Johannes Kyed KNR-imut oqaluttuarpoq.
