Great Greenlandip pisortaata EU-p meqqilersuinissaa kissaatigaa
Qaaqqusat akornanni tusaamasaqangaatsiartoq Great Greenlandip februaarip aallaqqaataanit pisortartaavata Ditte Sorknæsip pingasunngormat Hotel D'Angleterremi Københavnimiittumi Great Greenlandip ukiorsiutissatut takutitai isiginnaarpai.
Atisanik ilusilersuisartup Jesper Høvringsip nammineq haute couturiliaminik Great Greenlandillu atisaliaanik ataatsimoortitsilluni takutitsineq ingerlavoq. Ditte Sorknæsillu nuannarai. Kisiannili europami niuertarfissuarni tamalaani atisaliat tunineqarnissaat ilimanarpallaanngilaq.
EU-Kommissionip puisit amiinik eqqusseqqusinnginnermi naggueqatigiit Inuit tunisassiaasa ilaannginnissaannik paasissutissiinissaralua, iluamilli paasissutissiissutigineqarsimanngitsoq, qallunaat EU-parlamentimut ilaasortaattulli uparuarpai.
- Isumaqarpunga EU-p suliassani pimoorullugu suliarisimanngikkaa. Tamakkuninnga inerteqqutaalernissaannut aaliangersimagaanni kingunipilui aamma akuerineqartariaqarput, naggueqatigiillu Inuit nungutaannginnissaannut aaqqiisoqartariaqarpoq. Iluamimmi paasisitsiaannginnerup tamakku kingunerisinnaavai, Ditte Sorknæs KNR-imut oqarpoq.
EU meqqilersuilissagaluarput
EU-mi puisit amiinut qulartoqangaatsiarnera pillugu puisit amii inerteqqutit inerteqqutaanngitsullu pisisartunut paasinartunngortinniarlugit periusiliortoqartariaqartoq pisortartaaq isumaqarpoq.
Pisiniat takutissinnaagunikku puisip amia akuerisaanikumik nungusaataangutsumik piniarneqarnikuusoq atuisunut aamma sunniuteqassaaq, Sorknæs isumaqarpoq.
- Amerlasuunngorlugit tuniniaasartunut pisiniarfinnilu ammit naggueqatigiit Inunneersuunerannik (EU-mit, aaqq.) uppernarsaatinik amigaateqarpoq. Amiitiilinnut ajornartorsiutaangaatsiarpoq, taakkumi uppernarsaasussaammata puisit amii tuniniakkatik naggueqatigiit Inunninngaanneernersut imaluunniit allaneernersut, Ditte Sorknæs oqarpoq.
Puisit amii naggueqatigiit Inunninngaanneersut pillugit EU-p “paasissutissai” qallunaat EU-parlamentimut ilaasortanit arlalinik suliniaqatigiiffimmiillu Inuit Silamit isornartorsiorneqarput.