URANI Uranimik avammut nioqquteqarnissaq akuersissutigineqartoq
Aalajangiiffigisassatut siunnersuutit sisamat ullumi suliarineqarmata tamanna pivoq.
Ulorianartumik qinngornertalimmik ajutoortoqassagaluarpat ikiuunnissaq pillugu nunat tamalaat atomitalimmik nukissiuuteqarneq pillugu aalajangersagaannut Nunarput ilanngutissanersoq politikerit ilaatigut isummerfigaat.
Inuussutissarsiornermut naalakkersuisoq Vittus Qujaukitsoq siunnersuutit sisamat ataatsimoortillugit suliarineqartut aappassaaneerneqarnissaannut atatillugu akissuteqarluni allappoq, aalajangiiffigisassatut siunnersuutit uranitalimmik piiaanissamut akuersissuteqarnissamut tunngasuunngitsut, kisianni:
- Aalajangiiffigisassatut siunnersuutit sisamat taakkua, uranimik piiaasoqassappat aamma avammut annissuisoqassappat, tamatuma Kunngeqarfiup nunani tamalaani siaruartitsinnginnissamut pisussaaffii malinneqarlutik pisinnaanissaata qulakkeerneqarnissaanut tunngassuteqarput, Vittus Qujaukitsoq akissuteqaammini allappoq.
Aamma atuaruk Innuttaasunik taasititsisoqassanngilaq
Aamma atuaruk VIDEO Qinngornernut ulorianartunut eqqaaveqannginnissamik siunnersuut taperserneqanngilaq
Siunnersuutit sisamat uranimik piiaaneq avammullu tuniniaaneq pillugu danskit kalaallillu 2013-imi nalunaarusiaannik aallaaveqarput, nalunaarusiamilu tikkuarneqarpoq, qinngulanertalinnik isumannaatsuutitsiniarnermi nunanut tamalaanut pisussaaffiit naammassiniarlugit immikkut aaqqissuussinissaq pisariaqartoq.
Inatsisartut ippassaq aalajangiiffigisaat Folketingimi kingusinnerusukkut suliarineqassapput. Pineqartut tassaapput tunisassianik marloqiusamik atorneqartartunik avammut annissuinermik nakkutiginninneq pillugu Kalaallit Nunaannut inatsisissatut siunnersuut aamma atomip nukinganik atortussianik sorsunnerunngitsumut atuinermik nakkutilliineq pillugu Kalaallit Nunaannut inatsisissatut siunnersuut.
