Innuttaasunik taasititsisoqassanngilaq

Aatsitassanik ulorianartunik qinngornilinnik piiaasoqarnissamut niuerutiginninnissarlu pillugit innuttaasunik taasisitsisoqarnissaanik siunnersuut akuersaarneqanngilaq.
Assi © : Nils Baum/Bureau for Inatsisartut
Allattoq Mads Lynge
maajip 20-at 2016 18:05

Nunatsinni aatsitassarsiornermi uranimik aatsitassallu allanik ulorianartunik qinngornertalinnik saniatigut tamakkiisumilluunniit piiaasoqarsinnaalissanersoq avammullu niuerutiginnittoqarsinnaalissanersoq pillugu innuttaasunik taasititsisoqarnissaanik Inuit Ataqatigiit Inatsisartuni ilaasortaatitaasa siunnersuutaat ullumi taasissutigineqarmat amerlanerussuteqartut akuersaanngilaat.

Siunnersuummi Inatsisartuni ullumi aappassaaneerneqarneranut atatillugu taasisoqarmat qulingiluat akuersipput 13-it akerliusut. Siunnersuut taamasilluni itigartitsissutigineqarpoq.

Atassullu sinnerlugu Inatsisartuni ilaasortap Steen Lyngep siunnersuutaa, qulaani taaneqartumut assingusoq aamma aappassaaneerneqarluni taasissutigineqarmat marluinnaat akuersipput, arfineq-pingasullu itigartitsillutik.