Bakterissat Nunatsinniittut Danmarkimi naatsiianik naatitsisartunit iluaqutigineqassapput
Kujataani nunap ilaani naatsiianik naatitsivigineqartartuni bakteerissat paasineqartut oqummik ajornartorsiortitsisartumik minnerulersitsisartutut paasineqarput, tamannalu ilaatigut Danmarkimi naatsiianik naatitsisartunut pingaarutilerujussuanngorsinnaavoq.
- Ukiut arlaqanngitsut matuma siornagut Kujataaniitilluta angut naatsiianik naatitsisartoq oqaloqatigaarput. Nunap ilaa aalajangersimasoq naatsiianik ukiorpassuarni naatitsiffigiuartarini taassuma oqaluttuuppaatigut. Tamanna soqutigalugu paasisaqarfiginerorusulerparput, lektori Peter Stougaard suliniutertik pillugu taama oqaluttuarpoq.
Danmarkimi nunarsuarmilumi allani, nunaminertami aalajangersimasumi ukiuni tulleriinni amerlasuuni naatsiianik naatitsisoqarsinnaaneq ajorpoq, taakkumi oqoqalertaramik.
Bakteerissat maanna misissoqqissaarneqaleruttorput, taamalu Nunatsinni, Danmarkimi Europallu sinnerani akilersinnnaanerusumik nunalerinermik ingerlatsisoqarsinnaalerneranik kinguneqarnissaa neriuutigineqarluni, Københavnip Universitetianit tusagassiuutinut nalunaarumminni taama allapput.
