Ane Hansenip Kielsenip Qujaukitsullu aalisakkat perlukui pillugit naatsorsuutaat qularai
- Isumaqarpunga Siumukkut takorluuinerliorsimasut aammalu tunisassiat ullumikkut inerisarneqarnerannut tunngatillugu malinnaanngittoorsimasut, soorlu qaleralik eqqarsaatigalugu Royal Greenlandikkut 100 procentingajammik atuereerput aamma Halibutikkut Polar Seafoodilu malinnaalluartorujussuullutik.
- Taamaattumik pisassat suli taakkuinnaatillugit naatsorsuutigineqarsinnaanngilaq suli millionerpassuarnik isertitassaqartoq tassani, Ane Hansen KNR-imut oqarpoq.
Ane Hansenip isornartorsiuinera Vittus Qujaukitsup Kim Kielsenillu qineqqusaarnermi oqaaserisimasaannik tunngaveqarpoq. Taakkumi oqarput naatsorsuutigalugu aalisakkat perlukuinik tunisassiorneq marloriaatinngortinneqarsinnaasoq.
Aalisakkat perlukuinit millionerpassuarnik isaatitsinissamik tunngaveqarluta aningaasarsiornikkut pilersaarusiorsinnaanngitsugut, Inuit Ataqatigiit sinnerlugit aalisarnermut naalakkersuisuusimasoq oqarpoq.
- Siunissaq ungasittoq isigalugu nereriaatsit qanoq allanngoriartornissaat eqqoriaruminaattuaannarpoq. Nunarsuarmi pisisartut piumasaat sukkasoorujussuarmik allanngorsinnaasaramik, Ane Hansen Inuit Ataqatigiinneersoq taama nassuiaavoq.
Nassuerutigaalu tunisassiorfiit saarullinnik atorluaanerullutik pitsaanerulersinnaasut, taamaalillutik aningaasarsiutiginerusinnaallugit. Aalisarnermut Naalakkersuisoqarfiup 2010-mi missingersorsimavaa saarulliit sinnikui 2.300 tonsit ukiut tamaasa tulaanneqartartut.
