Grønlandsbanken PANAM2018-imut guldsponsorinngortoq

Grønlandsbanken Amerikap nunavittaani assammik arsarluni pissartanngorniunnerit Nuummi ingerlanneqarnissaannut aningaasaliisut ilagilerpaat.

Grønlandsbanken aningaasatigut tapersersuinissaanik PANAM 2018-imit isumaqatigiissuteqarfigineqarpoq, aningaaserivillu guldsponsoriussaaq.
 
Grønlandsbankenip aningaasanik qanoq amerlatigisunik tapersersuiniarnerluni oqaatiginngilaa, guldsponsoriussagaannili 350.000 koruunit sinnerlugit aningaasaliisoqartariaqarpoq.
 
Grønlandsbanken sulisutigut, piginnaasatigut aningaasanillu tunissuteqarluni tapersersuissasoq aningaaserivimmit oqaatigineqarpoq.
 
- Suliassaq taama annertutigisoq sulisussaqarluarnissamik aningaasassaqarluarnissamillu piumasaqaateqarpoq. Taakkununngalu marlunnut GrønlandsBANKEN soorunami tunniusseqataassaaq, allaffissornermut pisortaq Carsten Th. Pedersen oqarpoq.

AAMMA ATUARUK PANAM UNIBREWilu aningaasanik tapersiinissamik isumaqatigiissuteqartut

PANAM2018-imilu suliniummik aqutsisoq Poul Petersen naapertorlugu suliffeqarfinnik namminersortunik suleqateqarneq pingaaruteqarpoq.
 
- Kalaallit Nunaanni aningaaseriviit annersaata, timersornikkut pisussamut taama annertutigisumut, aammaarluni aningaasatigut sulisussatigullu tapersersuiniarnerata Panam2018-ip iluatsinnissaa, sutigut tamatigut ajornannginnerulersippaa, Poul Petersen oqarpoq.
 
Sermitsiaq.AG marlunngormat aamma allappoq Kommuneqarfik Sermersuumi aningaasaqarnermut inuussutissarsiornermullu ataatsimiititaliap PAN-AM-ip ingerlanneqarnissaanut 1,5 millionit koruuninik aningaasaleeqqinnissamik siunnersuut akuerisimagaa. Siunnersuulli kommunalbestyrelsimit inaarutaamik akuersissutigineqaqqaartussaavoq.
 
Nunatsinni assammik arsartartut kattuffiata pissartanngorniunnerit ingerlanneqarnissaannut aningaasat atorneqartussat qulakkeerneqarsimannginnerat nassuerutigalugu tapiiffigeqqinneqarnissamik qinnuteqartuuvoq.
 
PAN-AM, juunip 15-ianit 25-anut ingerlanneqartussaq kommunimit siornatigut 2 millionit koruuninit tapiiffigineqareerpoq.

AAMMA ATUARUK PANAM2018 suliniummi aqutsisussarsisoq