PANAM UNIBREWilu aningaasanik tapersiinissamik isumaqatigiissuteqartut
PANAM2018-imi aqutsisut siulittaasuata, Poul Petersenip Jørgen-Anker Ipsen Royal Unibrrewimeersoq aningaasanik tapersiinissamik isumaqatigiissuteqarfigaa.
Kalaallit Nunaani Assammik Arsartartut Kattuffiat Nuummi aasaru PANAM2018-eqarnissaanik aaqqissuisuussapput.
Royal Unibrewip Kalaallit Nunaannilu Assammik Arsartartut Kattuffiata akornanni aningaasanik tapersiinissamik isumaqatigiissuteqartoqarneratigut PANAM2018 piviusunngorluariartulerpoq. Isumaqatigiissuteqartut tamarmik nunat assigiinngitsut akornanni nunatsinni unammersuartoqarneratigut nunatsinni assammik arsarneq timersornerlu allunneqarnerulernissaa aammalu inuusuttut suli amerlanerusut Kalaallit Nunaani peqqinnerulermik inooriaaseqarnissaat angunipaat. Tusagassiutinut nalunaarummi taama allassimavoq.
Aqutsisut siulittaasuata, Poul Petersenip aningaasanik tapersiissuteqarnissamut isumaqatigiittoqarnera nuannaarutigaa:
- Qangali Royal Unibrew suleqatitut pingaarluinnartutut Kalaallit Nunaani timersornerup silarsuaani minnerunngitsumillu assammik arsarnermi nalunnginneqarluartuuvoq. Royal Unibrew ukiorpaalunngortuni tapersuisuunikuuvoq nunanut allanut unammisartunut aammalu arnat unammisarnerannut Faxe Kondi Cup-mi. Inuiaqatigiinni akulluartuupput, taamaattumillu aamma nuannaarutigivara Royal Unibrew PANAM2018 iluatsitilluarfiunissaanik suleqataarusummat, tusagassiutinut nalunaarummi allappoq.
KNR-ip PANAM2018-ip Nuummi ingerlanneqarnissaa piviusunngortinneqarnersoq uppernarsartissinnaasimanngilaa. Tamatumali piviusunngornissaa qanittuararsuanngorpasippoq.
Kalaallit Nunaata tungaanninngaanniit PANAM-ip piviusunngunnginnissaannik takussutissaqanngilaq, taamaammallu juunimi pinissaa qularnanngitsoq, siulersuisut ataatsimiititaliaata siulittaasuata Christian Keldsenip KNR-imut oqaatigaa.
Namminneq kajumissutsiminnik sulisut ilusilersukkanik atisannassasut
Royal Unibrewip, ilaatigut Faxe Kondi-liortartutut naluneqanngitsup kalaaleq ilusilersuisartoq Bibi Chemnitz PANAM2018-mi atisanik kusanarluinnartunik kajumissutsimminik ikiuuttussat 100-it sinneqartut atugassaannik sananermik suleqatigaa. Tamatuma saniatigut imernik sodavandinik, imerfinnik immikkullu naqitalinnik pisiassanik tapersiissuteqarnissamik isumaqatigiissut ilaqarpoq.
PANAM2018 ilaatigut ukuninnga tapersersorneqarpoq: Royal Unibrew A/S, NunaFonden, GrønlandsBANKEN, Namminersulutik Oqartussat, Elite Sport Greenland, TELEPOST A/S, Arctic Consensus, Kommuneqarfik Sermersooq, Air Greenland AS, Royal Arctic Line A/S, KNR aammalu Kalaallit Nunaani Timersoqartigiit Kattuffiat.
AAMMA ATUARUK PANAM2018 suliniummi aqutsisussarsisoq
