PANAM2018 suliniummi aqutsisussarsisoq
Nuummi Timersortartunut Efterskole PANAM2018-ilu suleqatigiinnissamik isumqatigiissuteqarnerisigut, Poul Petersen, PANAM2018-imi januaari aallarnerfigalugu aqutsisunngorpoq. PANAM2018-ip aqutsisuini siulittaasoq, Christian Kjeldsen, tusagassiuutinut taama nalunaaruteqarpoq.
Poul Petersen, politikommisæriusimasoq, timersornerup peqatigiiffilerinerullu silarsuaani ilisimaneqarluarpoq, sulianillu annertuunik namminersortunit, pisortanit, kattuffinnit kajumissutsimillu sulisunit peqataaffigineqartartunik piviusunngortitsisarnermik misilittagaqarluni.
- Poul Petersenip aqutsisunngorneratigut PANAM2018-imik piviusunngortitsinissatsinnut periarfissaqarlualerpugut – isummat aammalu kissaaterpassuit naappinniartussaapput uani pilersaarutitsinni unammersuarnissami, taakkulu Poulip pigilluinnarpai, aqutsisuni siulittaasoq, Christian Keldsen, nalunaarummi allappoq.
Juunip 15-25-anut PANAM2018-imi unammersuarnerup nalaani tikeraat 250-it missaanniittut tikinnissaat naatsorsuutigineqarpoq. Tassani unamminerit sakkortuut 42-t pissapput, nunallu peqataasut akornanni angusarinnerit pingasut VM-imut annguttussaallutik.
- Kalaallit Nunaata angutini assammik arsarlutik nunanut allanut unammisartui ineriartorluarput aammalu kattuffimmut pingaaruteqarpoq angunniunnissani PANAM 2018-imi aaqqissuisuussallutik nunarpullu takutitsiffiulluarnissaa takutikkusullugu, Kalaallit Nunaanni assammik arsartartut kattuffianni siulittaasoq Jørgen Isak Olsen nalunaarummi oqarpoq.
Unamminerit 42-sut Inussivimmi Godthåbhallenimilu pissapput.
AAMMA ATUARUK NunaFondenip Pan Am aningaasaleeqataaffigaa
