Nunarput qimarnujumasut pillugit oqallinnermi akuliunneqartoq
Danmarkimi naalakkersuisut aappaagumut aningaasanut inatsisissatut siunnersuutaat, Dansk Folkeparti peqatigalugu sapaatip-akunnerata massuma ingerlanerani isumaqatigiissutigaat.
Nunasiniat pinerluuteqarsimasut, Danmarkimiillu anisitaasimasut, Danmarkimit anisitaannginnerminni Vordingborgip kommuniani qeqertami Lindholmimi inissiisarfimmiitsinneqartarnissaat tassani aningaasaliiffigineqarpoq.
AAMMA ATUARUK DF: Kalaallit Nunaata nillernerata qimaasut angerlartiinnassavai
Qeqertalli Lindholmip toqqarneqannginnerani Danmarkimi politikerit Kalaallit Nunaat aamma eqqarsaatersuuteqarfigisimavaat. Folketingimut ilaasortap Joakim B. Olsenip, Liberal Alliancemeersup, Rene Christensenilu Dansk Folkepartimeersup, Vordingborgip kommuniata borgmesteianik Michael Smedimik, P1-imi Debattenimi oqallitsinneqarmata taama ilaatigut oqartoqarpoq.
Lindholmip toqqarneqannginnerani periarfissanik allanik peqarnersoq misissorneqarsimasariaqaraluartoq, borgmesterip Michael Smedip oqaatigimmagu Kalaallit Nunaat assersuutigaa:
AAMMA ATUARUK Sakkutooqarfik Kangilinnguit atorneqaqqilersoq
- Sapinngisamik avinngarusimasumiitsinneqarnissaat eqqarsaatigineqarsimappat, taava tupigaara Kangilinnguani Sakkutooqarfiusimasoq eqqarsaatigisimanngimmassuk, tamannani innuttaasut sinnerinut ungasissumiimmat, Vordingborg Kommunep borgmesteria Michael Smed oqarpoq.
- Tamanna eqqarsaatersuutigereerparput, aamma taamaaliortoqaqqusaanngilaq, Rene Christensen, Dansk Folkepartimeersoq oqarpoq.
AAMMA ATUARUK Kangilinnguani saliineq aallartinneqartoq
Joakim B. Olsenilu, Liberal Alliancemeersoq, tamanna pillugu ima oqarpoq:
- Naalagaaffeqatigiinnerup iluani pissutsit aamma eqqarsaatigineqartariaqarput, amerlasuummi taakku pingaaruteqartikkaat isumaqarpunga. Vordingborgimi, Danmarkimi ilaalluinnartoq, Naalagaaffeqatigiinnermilu pissutsit assigiinngitsuupput, Joakim B. Olsen, P1 Debattenimut oqarpoq.