Assi: Kerstin Pfeifer/KNR

DF: Kalaallit Nunaata nillernerata qimaasut angerlartiinnassavai

Danmarkimut qimaasut Nunatta avannaarsuanut nassiunneqartalernissaannik Dansk Folkepartiip EU pillugu oqaaseqartartua siunnersuuteqarpoq.

Qimaasunik nunarsuarmi qeqertat annersaannut aallartitsisoqarsinnaanerata qimaasut Danmarkiliarnaveersaartissavai.

- Takoreerpagummi Finlandimut qimaasut Finlandip nillerpallaarnera tunngavigalugu nunagisaminnut utiinnartut, Folketingimut ilaasortaq Dansk Folkepartiimeersoq Kenneth Kristensen Berth taama KNR-imut oqarpoq.

Nunarput qimaasunut piukkunnartippaa

Kangilinnguani sakkutooqarfiusimasup qimaasunut atorneqarsinnaanera Søren Espersenip siornatigut siunnersuutigisimavaa, Folketingimili partiit anginersaasa tulliata Nunatta avannaarsua aamma siunertamut piukkutilerpaa.

Sumiiffimmi pissutsit sakkortusinnaasarnerat ilisimagaluarlugit Kenneth Kristensen Berth taama isumaqarpoq.

- Angallavikkuminaatsuuvoq, nillertupilussuulluni amerlanngitsunillu najugaqarfigineqarluni, folketingimi ilaasortaq oqarpoq

- Aap, qimaasunut piukkunnartippara. Najugaqarfissaqarpata imaluunniit najugaqarfissaannik pilersitsisoqarsinnaassappat inunnik tappavunga inissiisoqarsinnaassaaq.

Qimaasut nannullu

Tunup avannaarsuata ilarujussua allanngutsaaliugaavoq, uumasullu kiisortut anginersaat, tassa nanoq, tappavani uumasuuvoq.

Kenneth Kristensen Berthilli tamanna ajornartorsiutitut isiginngilaa:

- Naagga, qimaasummi ilaat nunanit uumasunik nujuartanik ulorianartunillu uumasoqarfiusuneernerat aamma eqqaamaneqartariaqarpoq. Taava taakku nalusimassappassuk ilisimatinneqassapput nannut ulorianartuusut.

Aamma nunarsuup silaannaata kissatsikkiartornera Dansk Folkepartiip qimaasunik Nunatsinnukartitsinissamik siunnersuutaanut aporfiussanngilaq.

- Nalunngilara Kalaallit Nunaanni ukiuunera issaasannerusimasoq, taamaattoq Finlandimut naleqqiutissagaanni Kalaallit Nunaat nillerneruvoq. Qimaasut Finlandip nillernera pissutigalugu nunagisaminnut utiinnarsimappata, taava aamma Kalaallit Nunaata nillernera pissutigalugu angerlaannartoqarsinnaassagunarpoq, Kenneth Kristensen Berth KNR-imut taama oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat