'Grønlænderstiv' danskit oqaasiinut pisortatigoortumik ilanngunneqartoq
Oqariaaseq taanna nikassaarpaluttuuvoq isummanillu pigiliutiinnakkanik pissuteqarluni. Tamanna amerlanerit isumaqatigaat, taamaakkaluartorli tallimanngorpamit pisortatigoortumik danskit oqaasiinut ilangunneqartussanngorpoq.
Danmarkimi oqaatsinik ordbogimut ilanngussisoqaraangat oqariaatsit isumaat apeqqutaaneq-ajorput. Ordnet.dk-mi aaqqissuisoqarfimmi pisortaq, Lars Trap-Jensen, taama nassuiaavoq.
- Oqaatsit isummanik pigiliutiinnakkanik tunngaveqartunik ilikkaarput, tamanna avaqqunneqarsinnaanngilaq. Taamaattoq oqaatsit assersuutigalugu 'grønlænderstiv'-itut ittut nikassaarpaluttutut paasineqartarnerat mianersoqqussutiginiarsarivarput, TV2-mut taama oqarpoq.
Ordbogimi oqariaatsimut grønlænderstivimut nassuiaateqarnera innersuussutigaa. Svenskerstiv aamma taamaaqataanik isumaqartinneqarpoq.
Nassuiaammi ilaatigut atuarneqarsinnaavoq oqariaaseq nikassaarpaluttuusoq pisoqalisimasorlu, Kalaallit Nunaanni imigassamik atuineq ukiuni kingullerni 20-ni milliartupiloorsimammat.
Danmarkimi kalaallit peqatigiiffiisa 23-iusut kattuffiata Inuit oqariaatsip 'grønlænderstiv'-ip ordbogimut ilanngunneqarnera isornartorsiorpaat.
