Kommunet killeqarfiisa iluanni arsaannermi unammiuaartoqarsinnaavoqAssi: Malik Brøns, KNR

GIF: Nuna tamakkerlugu pissartanngorniunnerit unitsikkallarneqassapput

Timersoqatigiit kattuffiata ilaasortaminut innersuussut nassiuppaa inuit katersorsinnaanerannut nalunaarut nutarterneqareersoq

GIFip innersuussutigaa timersuutini assigiinngitsuni sungiusarneq ingerlaannarsinnaasoq – aamma isikkamik arsaannermi aammalu timersuutit allat timimiit timimut attuisut pineqartillugit.

Kattuffik oqaaseqateqarpoq nappaatip coronap inuiaqatigiinni tuniluunnissaa pitsaaliorniarlugu maleruaqqusat nutaat suliarineqareersut.

Maleruaqqusat nutaata malunnaateqarnerupput aaqqissuussani anginerusuni nuna tamakkerlugu peqataaffigineqartuni. Tamatuma pineqartut tassaapput GIF naapertorlugu nuna tamakkerlugu pissartanngorniunnerit.

- Kalaallit Nunaanni timersoqatigiit kattuffianniit innersuussutigaarput nalunaarutip atuuffia tamaat augustip aallaqqaataata tungaanut Nunatsinni pissartanngorniunnerit taamaatikkallarneqassasut, GIF-mi allattuuneq Jonas Jensen nalunaaruteqarpoq.

AAMMA ATUARUK Nuuk Marathon annikillisamik pisussanngorpoq

Nalunaarut pineqartoq inuit katersorsinnaanerannik killiliigallarneruvoq. Taamaattoq kommunet killeqarfiisa iluanni aaqqissuussisoqarsinnaavoq.

- Assersuutigalugu peqatigiiffiiat iligiiaallu Kommune Kujallermi aaqqissuussanut Qaqortumit, Narsamit Nanortalimmiit nunaqarfiiniillu Kommune Kujalliup iluani unammiuaarsinnaapput. Iligiilli illoqarfinni pineqartuneersut assersuutigalugu Kommuneqarfik Sermersuumi aaqqissuussanut peqataasinnaanngillat, GIF innersuussuteqarpoq.

Maraton minillugu

Ataasiakkaarluni timersuutit ajunnginnerusumik inissisimapput ullut aalajangersimasut ataqqineqarsinnaappata. Tamanna atuuppoq assersuutigalugu Aasiaat Midnight Sun Marathonimi tallimanngorneq junip 26-at peqataaniartunut.

- Kommune Qeqertaliup avataani najugallit Aasiaat Midnight Sun Marathonimi peqataasinnaapput pineqartoq kingusinnerpaamik junip 19-at peqataanissamut nalunaareersimaguni, GIF allappoq.

AAMMA ATUARUK Aasiaat Midnight Sun Marathon Aasiammiuinnaat eqqamiuinnaasalu arpaffigissagaat

Inuit katersorsinnaanera pillugu nalunaarut erseqqissarneqarpoq taassumalu nutarternera junip 20-at atuutilerpoq.

Taamaattorli nuna tamakkerlugu pissartanngorniunnerit augustip aallaqqaataata tungaanut taamaatinneqarallarput.

- Taamaatitsigallarnermik sivitsuisinnaanissat pisinnaapput killilersuingallarnerit maligatassallu oqartussanit aalajangerneqartut aallaaviussarmata, GIF nalunaarutip qanorpiaq paasineqarnissaa pillugu namminersorlutik oqartussat ataatsimeeqatigereerlugit allappoq.

Isummersuutit