ASSIT GIF: Isorliunerusuni kajumissutsimik suliallit nersorniarneqarnerusariaqarput
GIF ESG-lu Tasiilami appatasitsillutillu timersuutinik assigiinngitsunik oktobarip qeqqani sammisassaqartitsipput. Taakkulu saniatigut meeqqanik nuannarineqaqisumik OL-ertitsisuusaarimallutik.
Kajumissusillik pikkorissarneqartut
GIF aamma ESG Tasiilami timersuutinik sammisassaqartitsiinnaratik kajumissutsimik sungiusaasartunik timersornerullu iluani peqatigiiffilerinermik sulialinnik pikkorissaasimapput.
- Timersuutinik assigiinngitsunik ineriartortitsinermi pingaaruteqarpoq siunissaq eqqarsaatigalugu periarfissanik ammaanissaq. Taamaammat Tasiilami innuttaasut kajumissusillik pikkorissarneqarput sungiusaasutullu ilinniartinneqarlutik, Kim Holflod, GIF-imi pilersaarusiornermi siunnersorti oqarpoq.
Aamma sulorartartut kattuffiannit GIF suleqatigalugu suloranermik pikkorissaasoqarpoq. Tassani atuartitsinermi timersorneq annerusumik sammineqarluni.
- Taamaaliornikkut ilisimasat piginnaasallu minnerunngitsumillu attaveqatigiinnissami periarfissat nukittorsarneqarput ineriartortuarnissamullu ikorfartuutaassallutik, Kim Holflod
Utoqqaat timersortarnissaat aamma timersornermik sammisaqartinneqarsimapput. Johanne Jonathansen Eqartoq Sisimiuneersoq Tasiilameeqataasimavoq. Taassuma utoqqaat qanoq timertik aalatittarsinnaanerinik ilitsersorneqarsimallutik.
Timersorneq Tasiilami timersorneq nuannarineqarlunilu soqutigineqarluartoq Kim Holflodip maluginiarsimavaa.
- Tasiilamiinnitsinni innuttaasut kajumissuseqarluartut malunnarpoq. Taamaattorli sammisassaqarnerunissaat kajumissutsimillu sulisut kivitseqataajuartut nersorniarneqarnerunissaat oqaatigisariaqarpoq, Kim Holflod oqarpoq.
- Kajumissusillik sulineranni ineriartortitsinerinilu tapersersorneqarluarnissaat pissusissamisoorpoq. Suliassaqartaqaat tassami sungiusaasuullutillu peqatigiiffilerinermik suliaqartaramik. Taakkuukkajuttarpullu inuit ataasiakkaat sulinissaminnik nukissaqarluartut, Kim Holflod KNR-imut oqarpoq.
Taassuma aamma oqaatigaa illoqarfinni mikinerusuni nunaqarfinnilu isorliunerusunilu kajumissuseqarlutik sulisut timersornerup iluani kivitseqataasartut pikkorissarneqarlutillu ilinniartinneqarnissaat pingaaruteqartoq, tamannalu GIF-ip peqataaffigissagaa.
