Georgiap præsidentiata akerliussutsimik takutitsisoqarnissaa kaammattuutigigaa

Georgiami inatsisartunut arfininngornermi qinersinermi inernerit akerliussutsimik takutitsivigineqarnissaat, Georgiap præsidentiata Salome Zurabisjvilip kaammattuutigaa.

Arfininngormat qinersinermi inernerit pisortatigoortut taassuma akuersaarumanngilai, Georgiamimi naalakkersuisut partiiat Georgisk Drøm ajugaasutut tassani suaarutigineqarpoq.

Qinersisartut taasinerannik tillinnerusoq, præsidenti oqarpoq.

Georgisk Drøm Georgiami qinersinermut ataatsimiititaliaq naapertorlugu 54 procentinit taaguunneqarpoq.

Illuatungiliuttut partiivi sisamat katillugit 38 procentinit taaguunneqartut nalunaarutigineqarpoq.

Georgiami qinersinermi inernerit ernummatigalugit ilungersunartullu, Danmarkip nunanut allanut tunngasunut ministeriata Lars Løkke Rasmussenip (M) oqaatigaa.

Qinersinermi naapertuilluanngitsuliortoqarlunilu kimigiisertoqartoq, najummassimanartorsiortoqartorlu, Lars Løkke Rasmussen inoqatinut attaveqaqatigiittarfikkut X-ikkut allappoq.

Georgia EU-mut ilaasortanngorusunnersoq, taamaaliorniannginnersorluunniit, Georgiami inatsisartunut qinersinerup takutikkaa oqaatigineqarpoq.