George Floyd arnami iliviata saniani ilisaassasoq

Taartumik amilik 46-nik ukiulik, George Floyd, Minneapolisimi politiimit qaamasumik amilimmit tigusarineqarnermi kingorna toqusoq, taartumik amilinnik nikassaasarneq politiillu nakuusertarnerat pillugit nunani tamalaani akerliussutsimik takutitsinernut aallaaviusoq ullumi marlunngornermi ilisaassaaq.

George Floyd, arnami Houston Memorial Gardensimi iliviata saniani nunatta nalunaaqutaa naapertorlugu ualeru nalunaaqutaq marlunut ilisaassaaq. Nutaarsiassaqartitsivik AFP taama allaaserisaqarpoq.

George Floyd ataasinngormat eqqaaniarneqarpoq, ilerra oqaluffiit ilaanni takuniarneqarsinnaalluni.

Inuit 6000-nit amerlanerusut eqqaaniaanermi peqataapput, Texasip guvernøria Georg Abbott taakkununnga ilaalluni, soorlu aamma isiginnaartitsisartoq ilisimaneqarluartoq Kevin Hart peqataasoq.

AAMMA ATUARUK George Floydimik tigusarinnittoq piaaraluni toqutsisimasutut unnerluutigineqartoq

Demokratit sinnerlugit præsidentimut sassartitassatut piukkunneqartup, Joe Bidenip, George Floydip ilaqutai ilisisoqannginnerani naapippai.

Præsidentimut tullersortaasimasup Bidenip ilisisoqarnissaanut oqaaseqaataa ilisisoqarnerata nalaani takutinneqassaaq.

George Floyd maajip ulluisa 25-anni toquvoq, Minneapolisimi politiimit Derek Chauvinimit tigusarineqarnermi qungasia minutsini arfineq-pingasuni sekundinilu 46-ni nanerneqarnini toqqutigalugu.