George Floydimik tigusarinnittoq piaaraluni toqutsisimasutut unnerluutigineqartoq
Politiimut USA-mi Minneapolisimi angummik taartumik amilimmik 46-nik ukiulimmik peqqarniitsumik sapaatit akunnerata siuliani tigusarinnittumut pasilliutit, Minnesotami unnerluussisussaatitaasut sukannernerulersippaat.
Politeeq mianersuaalliorluni toqutsisimasutut pasineqaraluarpoq, piaaralunili toqutsisimasutut maanna pasineqalerluni. Suliamut atatillugu tusarfiit arlallit aviisimut Star Tribunemut taama ilisimatitsipput.
Politiit allat pingasut George Floydimik tigusarinninnermut atatillugu aamma unnerluutigineqassapput.
Piaaraluni toqutsinermi peqataasimasutut taakku unnerluutigineqassapput.
AAMMA ATUARUK EU-mi qullersap Floydimik toqutsineq pissaanermik atornerluinertut taallugu assuarigaa
Politeeq Derek Chauvin mianersuaalliorluni toqutsisimasutut pasineqarluni tallimanngormat tigusarineqarpoq.
Politiit arlallit George Floydip nunamut aalajangerlugu tigummineqarnissaanut ikiuupput.
George Floyd qiminneqarluni toqutaasoq, toqusimasumik misissuereernerup kingorna inerniliunneqarpoq.
Politiinut tigusarinnittunut pasilliutit sukannernerulersinneqarnerat George Floydip ilaqutaasa nuannaarutigaat.
- Alianartumik pisoqarnerata nalaani taama pisoqarnera nuannaarutigaarput. Politiit George Floydip toqutaaneranut peqataasut tamarmik pasineqarlutillu unnerluutigineqalernerat qujamasuutigeqaarput, Floydip ilaqutaasa eqqartuussissuserisuat Twitterikkut taama allappoq.
