EU-mi qullersap Floydimik toqutsineq pissaanermik atornerluinertut taallugu assuarigaa
![](/sites/default/files/styles/image_934x467/public/article_images/20200602-125208-l-1920x1323we.jpg?itok=MvJV_-p_)
EU-p nunanut allanut tunngasunut qullersaata amerikami oqartussat taartumik amillip George Floydip sapaatit akunnerata siuliani toqutaanera pillugu "quarsaarutigai" pissanermillu atornerluinerarlugit. Nutaarsiassaqartitsivik Ritzau taama allappoq.
Nunanut allanut tunngasunut qullersap, Josep Borrellip, illuatungeriit nakuuseqqunagit Bruxellesimi tusagassiortunik katersortitsinermi kaammattorpai.
- George Floydip inuartarineqarnera amerikamiuusugut annilaarutigaarput tupassutigalugulu. Pissaanerup ingattarsertumik atorneqannginnissaa inuiaqatigiinni ikinnerusuni eqqumaffigisariaqarparput, Borrell oqarpoq.
Inuit pisinnaatitaaffii eqquutsinnissaata pingaaruteqassusaat aamma eqqaavai.
AAMMA ATUARUK Trumpip akerliussutsimik takutitsisut sakkutuulersuunniarai
George Floyd Minneapolisimi politiimit qaqortumik amilimmit sapaatit akunnerata siuliani ataasinngornermi tigusaanermini toqutaavoq.
Politiip Floyd tigusarimmagu seeqquminik qungasiatigut pukusuatigullu minutsini arlalinni nanerpaa. Floydip tigusarineqarnermini anerteqisaarluni oqartoq videomik immiunneqarsimavoq.
Politeeq taanna taama pisoqarneraniit ullualuit qaangiummata tigusaavoq.
Pisoq USA-mi eqqissiviilliortoqarujussuarneranik sakkortuumillu akerliussutsimik takutitsisoqarneranik kinguneqarpoq.
- Ammip qalipaataanik immikkoortitsineq sunaluunniit assuaraarput. Amerikamiut ataqatigiilersinnaasut nunalu ataasiulluni ataatsimooqqilersinnaasoq upperaarput, Josep Borrell oqarpoq.