GE: Ataatsimiititaliarsuup paasissutissat pingaarutillit pissarsiarinngitsooratarsinnaavai
Aalisarneq pillugu ataatsimiititaliarsuup sulinermini tunngavissaata saqqummiunneqareersup piareersarnera sivisuallarpoq, taavalu inuussutissarsiortut politikerillu peqataatinneqanngippallarsimallutik, Sulisitsisut pisortaat Brian Buus Pedersen taama isumaqarpoq. Polar Seafood nunatsinni ingerlatseqatigiiffinni namminersortuni anginerpaasoq ilaasortaannut ilaavoq.
AAMMA ATUARUK Aalisarnermut ataatsimiititaliarsuassaq iluatsinngitsuussaaq
- Isumalioqatigiissitaq pillugu tusarniaanerit torersumik ingerlanneqarnissaat takorusunnikuuarput, sulinerlu matoqqavallaaqimmat isornartorsiugaatsiartarnikuullugu, ataatsimiititaliarsualiornerup sivisunera eqqarsaatigissagaanni. Ingammik inuiaqatigiinni naaperiuteqarnissaq aalisarnerullu sivisuumik attanneqarsinaasumik aqunneqarnissaa eqqaarsaatigigaanni, Sulisitsisut pisortaat Brian Buus Pedersen oqarpoq.
Paasissutissat:
- Aalisarneq pillugu ataatsimiititaliarsuup suliassaraa ataatsimiititaliarsuarmut suliakkiutaasumi immikkoortut siunnersuutillu 24-t misissussallugit.
- Ilaatigut Kitaani sinerissap qanittuanut avataanullu raajartassiissuteqartarneq allanngortillugu assigiimmik pisassiisalernikkut iluaqutissartaasinnaasut ajoqutaasinnaasullu misissorneqassaaq.
- Ataatsimiititaliarsuup sulinera aalisarneq pillugu nutaamik inatsisiliortoqarneranik kinguneqartussaavoq.
- Aalisarneq pillugu inatsit maanna atuuttoq 1996-imeersuuvoq, kingornalu 13-eriarlugu allanngortinneqarsimalluni.
- Aalisarneq pillugu ataatsimiititaliarsuup suliani kingusinnerpaamik 2020-mi juunimi naammassereersimassavaa.
- Aalisarneq pillugu ataatsimiititaliarsuarmut 2 millionit koruunit immikkoortinneqarput.
- Ataatsimiititaliarsuaq aqqaneq-marlunnik ilaasortaqassaaq, taakkununnga ilaalluni ataatsimiititaliarsuarmi siulittaasoq Jens Paulsen.
Aamma aalisartut, ingammillu Polar Seafoodip Royal Greenlandillu ataatsimiititaliarsuarmi Naalakkersuisunit ilaatinneqannginnerisigut, aalisakkanik avammut tuniniaarnermik ilisimasanik aataatsimiititaliarsuarmi amigaateqarnissaq erngummatigaa.
- Tamatumani ataatsimiititaliarsuup inuttalersugaanera amigartutut isumaqarfigaarput, Brian Buus Pedersen oqarpoq
Suliassiissummi immikkoortut apeqqutilluunniit 24-it misissugassatut ilaapput, soorlu aamma ataatsimiititaliarsuaq nammineq misissugassaminik qaqitsisinnaasoq.
Misissugassanut ilaavoq kitaani raajartassat tamakkiisut sineriassiortunut avataasiortunullu assigiimmik avinneqassanersut, aamma raajarnianissamut qaqugorsuarmut akuersissuteqartarneq atorunnaarsinneqarsinnaanersoq.
Tamanna Sulisitsisut akerlerereeraat, pisortaq oqarpoq.
AAMMA ATUARUK Naalakkersuisooqatigiit tapersersortaasalu isumaqatigiinnginnerat pissutaavoq
- Kisianni isumaqarpunga atatsimiititaliarsuarmi akuusussat tamarmik ammasumik periuseqarlutik suleqataasariaqartut. Tamakkua tamaasa allaaserillualernissaat, uuttortarnissaat nalilersornissaallu piffissanngorpoq, taamaaliornerup suna kingunerissaneraa politikerit paasiniassammassuk, Brian Buus Pedersen taama oqarpoq.
Naalakkersuisut ataatsimiititaliarsuup sulinissaanut aningaasanik 2 milliuunit koruuninik immikkoortitsinikuupput, ataatsimiititaliarsuaq suliaminik kingusinnerpaamik aappaagu junimi naalakkersuisunut saqqummiussissaaq.