GC'ip Exelisip suliassanngortitseqqissutaa tunuartippaa
Suliffeqarfiup Namminersorlutik Oqartussanit pigineqartup Greenland Contractorsip pisortaanera Peter Kofoed taama oqarpoq, paasissutissanik avitseqatigiinnissaq pillugu inatsisit malinneqartussaanerat innersuussutigalugu:
Exelis Services oqarpat Greenland Contractors paasissutissanik sulisuminut tunngasunik Exelis Servicesimut Pituffimmi ukioq manna oktobarimi sullissisuulersussamut tunniusserusunngitsoq, tamanna ilumuunngilaq.
Aamma atuaruk Exelis Servicep isornartorsiut kukkunertut taavaa
Greenland Contractorsip pisortaanera Peter Kofoed taama oqarpoq.
- Paasiuminaatseqaara. Paasissutissanik sulisutsinnut tunngasut Exelis Servicesimut ingerlaavartumik tunniussisarpugut, sulisullu piginnaasaasa ilinniagaasalu pillugit allattorsimaffimmik suliaqarnerput ingerlaqqittoq aamma oqaatiginikuuarput, Exelis Servicesillu sulisutsinnut apeqquteqaataanut akissuteqartarluta, Peter Kofoed oqarpoq.
Sulisoriniakkat amerikamiut illersornissaqarfianni sulinermik misilittaqagaqarsimanissaannik Exelis Servicesip Pituffummi sakkutooqarfimmi inuttassarsiornerminut atatillugu taama piumasaqaateqarnera pissutaalluni tamanna oqallisigineqarpoq.
Aamma atuaruk IA: Amerikamiut neriorsuutertik eqquutsittariaqarpaat
Exelis Servicesip taama piumasaqaateqarnera Inuit Ataqatigiit sinnerlugit Folketingimi ilaasortap Johan Lund Olsenip isornartorsiorpaa, tassami Vectrusip, Exelis Servicesimik piginnittup danskinik kalaallinillu sulisoqarniarnertik siornatigut oqaatigisarsimammagu.
Amerikamiut illersornissaqarfiata Pituffimmi sakkutooqarfimmi atorfinnut ataasiakkaanut atatillugu sulisut piginnaasaannut piumasaqaateqarsinnaasuusoq, Exelis Servicesip siusinnerusukkut oqaatiginikuuaa. Maannakkut sulisorineqartut allannguutitaqanngitsumik tigummiinnarneqarnissaat Exelis Servicesip aamma oqaatiginikuuaa, ilanngulluguli aamma oqaatiginikuuaat paasissitissanik tunniussiffigineqanngikkunik sulisoriinnarsinnaanagit.
Paasissutissalli inatsisit atuuttut naapertorlugit tunniunneqartartut Greenland Contractorsip pisortaanerata Peter Kofoedip erseqqissaatigaa:
- Imaassinnaasoq paasissutissat ilaat tunniussinnaanngikkigut, tunniunnissaannulli pisussaaffeqangitsugut, Exelis Servicesillu isumaqatigiissusiornerminut atatillugu pisariaqartinngisaanik aamma peqarsinnaavugut, Peter Kofoed oqarpoq.
