Exelis Servicep isornartorsiut kukkunertut taavaa

- Sulisussarsiorluni allagarsiissutini isumaqatigiissummi piumasaqaataavoq taama allassimanissaa. Sakkutooqarfimmi isumaqatigiissummi ersarilluinnartumik allassimasutut tassani atorfinittussaq allaaserineqarsimavoq.

Assistant Airfield Manageritut atorfik ullumikkut danskisut innuttaassusilimmit Greenland Contractorsineersumit atorfigineqarpoq. Maannalu sulisorineqartut atorfimminni ingerlaannarnissaminnut neqeroorfigineqarsimasut, Kim Ruberg oqarpoq.

- Pituffimmi atorfillit tamaasa maannamutut isumaqatigiissuteqarlutik ingerlaannarnissaannik neqeroorfigineqarput, pikkorissarnissamullu pisariaqartitsippata - taava ikiorsinnaavagut.

Aamma atuaruk IA: Amerikamiut neriorsuutertik eqquutsittariaqarpaat

- Taava ima paasissavarput maanna tassani atorfilik ingerlaannarnissaminut naaggaarsimasoq? Apeqqutigaarput.

- Naamik taamaattoqartariaqanngilaq. Annertuumilli ajornartorsiutigaarput piginnaasaat ilinniakkallu pillugit paasiniaanissamut periarfissaqannginnatta. Inuit ataasiakkaat piginnaasaasa ilinniagaasalu allattorsimaffii iserfigisinnaanngilagut. Tamakkumi Greenland Contractorsip pigisarai. Taamaattumik qitiusumik atorfiit arlaqartut inuttassarsiuuttariaqarpavut. Neriuutigaarpullu inunnit atorfeqareersunit piginnaaneqarluartunit tamakku qinnuteqarfigineqassasut. Oqareernittut piffissaagallartillugu - oktobarip aallaqqaataani akisussaaffik tigusussaagatsigu - taava atorfillit eqqortut piginissaat qulakkeertariaqarparput.

- Kisianni amerikamiut sakkutuuini misilittagaqarnissaq piumasaqaataappat, taava ullumikkut atorfilik taamaaleriataaginnarsinnaanngilaq, oqarfigaarput.

Aamma atuaruk Exelis Servicesip aalajangiineq naatsorsuutigisani naammagisimaarpaa

- Taanna akisinnaanngilara. Ilisimanngilarpummi siusinnerusukkut inuttassarsiuinermi tamanna piumasaqaataasimanersoq. Atorfippaaluupput timmisartut isumannaattuunissaannik sammisaqartut, tassaniittussallu amerikamiut suleriaasaannut naleqquttuusariaqarput. Amerikamiummi sakkutooqarfigaat, tamannalu eqqumiitsortaqanngilaq, oqaaseqartartoq naggasiivoq.