Gazami sapaatit akunnerni arfinilinni sakkuaakkunnaarallartoqarnissaanik USA isumaqatigiissitsiniartoq

Gazami sivikinnerpaamik sapaatit akunnerni arfinilinni sakkuaakkunnaarallartoqarnissaanik USA isumaqatigiissitsiniarpoq, sallunaveeqqutitullu tigummiarneqartut iperagaanissaat aamma isumaqatigiissutigineqarniarluni.

USA-p præsidentia, Joe Biden, Jordanip kunngia Abdullah peqatigalugu tusagassiortunik præsidentip Washingtonimi illorsuani katesortitsinermi taama oqarpoq.

- Sallunaveeqqutitut tigummiarneqartut iperagaanissaannik Israelip Hamasillu akornanni isumaqatigiissusiortoqarnissaa USA-p sulissutigaa, sivikinnerpaamillu sapaatit akunnerni arfinilinni sakkuaakkunnaarallartoqarnissaanik piaarnerpaamik tamanna aamma malitseqarnissaa USA-p sulissutigaa, sakkuaakkunnaarallarneq ataavartoq aamma anguniarneqarluni, Joe Biden oqarpoq.

Gazami innuttaasut Gazap kujasissuanut Rafahp nalaanut qimaasimasortaat illersorneqartariaqartut Bidenip ilanngullugu oqaatigaa, nunakkummi saassussinissani pilersaarutigalugu Israelip nalunaarutiginikuuaa.

Israelip Rafahmik saassussinissaa pisariaqartinneqanngitsoq, kunngi Abdullahp oqaatigaa.

- Ikiorsiiniarnerup tamanna pillugu ajornarnerulernissaa qularnanngilaq. Tamanna isiginngitsuusaaginnarsinnaanngilarput. Sakkuaakkunnaarallarneq ataavartoq atorfissaqartinneqarpoq. Sorsukkunnaartoqartariaqarpoq, Jordanip kunngia oqarpoq.

Gazami pinngitsoorani sakkuaakkunnaarallartoqartariaqartoq, kunngi Abdullahp arlaleriarluni piumasarinikuuaa.

Israelilli Hamasimik akiuiniarnera USA-p tapersersormagu, sakkuaakkunnaarallartoqarnissaa USA-p imaasiinnarluni kissaatiginngilaa. Sallunaveeqqutitulli tigummiarneqartut iperagaanissaannut sakkuaakkunnaarallartoqartarnissaa USA-p kaammattuutigaa.

Bidenili Israelip Gazamik saassussinera pillugu sukannersumik oqaaseqartalernikuuvoq.