GAp Kuupik isumaqatigaa
Siunissami pisariaqartinneqartut tassaapput ilinniartitaanermut sanaartornermullu nuna tamakkerlugu pisariaqartitsinerit - taakkulu GAp pingaartilluinnarpai. Taakkumi pingaartikkaanni aatsaat nunatsinni ineriartorneq qulakkeerneqarsinnaasoraat.
London Miningip aatsitassarsiorniarnerani IBA-mik isumaqatigiinniarnissat aamma nunatsinnut inuinullu pingaaruteqarluinnartussaapput. Tassanimi qulakkeerneqassammat London Miningimik suleqateqarnermi nunatta inuisa sapinngisamik pissarsiaqarluarnerunissaat. GAp ersisaarutitut assersuutigaa Danmarkimi Metroselskabimik suleqateqarneq Københavnimi metrop suliarinerani pisoq. Taamani isumaqatigiissutaagaluarpoq metrop suliarinerani ilinniartut 400-ut suliffissaqarnissaat qulakkeerneqassasoq, ullumikkorpiarli marluinnaat ilinniartuutigineqarput. Pissutsit tamakku nunatsinni pinnginnissaat qulakkeerniarneqarpoq taamaanngippat siunissaq ernumanartulerujussuussammat.
Kuupik Kleist ukiortaami oqalugiaammini siunnerfilimmik oqaloqatigiinnissamik kaammattuivoq tamannalu GAmit isumatigineqarportaaq. Naak naalakkersuisut isumaqatigiuaannanngikkaluarlugit taamaattoq inuussutissarsiornerup inuiaqatigiillu siunissaat pillugu 2013-mi isumaqatigiinniarnissamut GA qilanaarnerarpoq.
GAp ukiortaami oqaaseqaataa tamakkerlugu ataani aasinnaavat.