GA: Kangia Ruslandilu isumaqatigiissuteqarfigissallugit tulluartuupput
Killilersugaanngitsumik niueqatigiinnissaq Kalaallit Nunaata isumaqatigiinniassutigissappagu Kangiani asia Ruslandilu aallartiffissatut tulluartuupput.
Allattoq Nauja Møller
decembarip 18-at 2014 10:23
Taama oqarpoq Sulisitsisut Kattuffianni pisortaq Henrik Leth. Taassumallu oqaatigaa paasisinnaallugu isumaqatigiinniarnerit taama ittut piffissami sivisuumi ingerlanneqartartut.
- Nunatsinni pisiassat amerlasuut akitsuutitaqanngitsumik eqqussorpavut. Elektronikkimut tunngasut aamma Japanimiit Kinamiillu pisiassat assigiinngitsorpassuit akitsuutitaqartinngilagut, taamaattumik iluassagaluarpoq inuussutissat taakkununnga tunisartakkagut akitsuutitaqanngikkaluarpata. Kisianni taamaaliussagutta suliaq annertussasoraara, Henrik Leth oqarpoq.
AAMMA ATUARUK Nunatta killilersugaanngitsumik niueqatiginnissinnaaneq misissorpaa
Taannalu isumaqaraluarluni suliassaq annertussasoq killilersugaanngitsumiik niueqatiginnissamik isumaqatigiinnissaq angutserlugu piffissamik atuinissaq imminut akilerumaartoq ilimagaa:
- Iluaqutaassaqaaq nuannaarutigissagaluaqaarput. Pitsaanerpaavoq tuniniaanermi atugassarititat pitsaasuuppata. Iluaqutaassaqaaq amigaatigineranullu isornartorsiutaanngilaq isumaqatigiissutiginiarlugu suliassaq annertoqimmat. Apeqqutaassaarlu iluatsissagaluarutsigu qanoq annertunerutigisumik tunisaqarnerulernissarput, Henrik Leth oqarpoq nangillunilu oqaatigaa isumaqatigiittoqassapput ajorinagu, iluatsinngippallu susinnaarpiarnagu. Taamaattumik attaveqatigiiffigeriikkagut ullumikkut naammagiinnartariaqarigut.
Nunarpullu killilersugaanngitsimik niueqatigiinnermut isumaqatigiissusiorniassappat sulisitsisut kattuffiata pisortaata sumi aallartittoqassanersoq siunnersuutissaqartippaa.
- Kangiani asiami Ruslandilu aallartiffissatsialaapput. Kikkut tamarmik akitsuutinik akilersuisarput, taamaattumik uagutsinniit pitsaanerusumik inissisimasoqanngilaq. Iluaqutissaqaleruttalu ajornavianngilaq, Sulisitsisut Kattuffiani pisortaq Henrik Leth, taama oqarpoq.
