GA aamma SIK: Ove Karlip inuiaqatigiit avissaartuutsippai
SIK aamma GA isumaqarput, London Mining taama annertutigisumik isumaqatigiinniarnermi oqartussaaffilerneqarnerani, aatsitassarsiornermi sullissisussat soqutiginnittullu isumaqatigiinniarnissami nerriviup illuatungaanut pisinneqartullusooq.
IBA-mut tunngasut, qaammatip uuma ingerlanerani London Miningimut isumaqatigiinniutaasussaapput. Namminersorlutik Oqartussat kommunillu akornanni isumaqatigiinniarnermi qulakkeerneqartussaavoq, London Miningimut piumasaqaatit eqqortumik taakkunannga atuutsinneqarnissaat.
Assersuutigalugu Isukasiani saviminissamik piiaanissami, Kalaallit Nunaanni sulisartut najugaqavissullu London Miningimit atorneqarnissaat.
Suulli isumaqatigiinniutaassanersut Naalakkersuisunit siumut aalajangiussaareersimavoq, naak pitsaanerussagaluartoq Nunatsinni aatsitassarsiornissamut attuumassuteqarsinnaasut tamaasa siunniussassamik ataatsimoorussamik piumasaqaasiortikkaanni, assersuutigalugu SIK-p GA-llu qanoq kissaateqarneri aatsitassarsiortunut tunniullugit.
- Nunatsinni ataatsimoorussaqarluta aalajangeeqataaniarutta, isumaqatigiinniarnissamik pilersaarut naleqqutinngilaq. Aatsitassarsiornermut soqutigisaqartut ataasiakkaarlugit ataatsimeeqatiserineranni, London Mining pissaanermik angisuumik tunineqarpoq, tamannalu naleqqutinngilaq, Kalaallit Nunaanni Sulisitsisut peqatigiiffiata pisortaa, Brian Buus Pedersen taama oqarpoq.
Taama isumaqatigiinniarnerup pilersaarusiorneqarnerata pilersissavaa, Namminersorlutik Oqartussanut kommunillu isumaqatigiinniarnermi, London Miningip namminerluinnaq piumasaminnik anngussinissaat.
- Uani pisumi ernummatigaarput, IBA-mut tunngasunik ataasiakkaalluta oqaloqatigineqarutta, assersuutigiinnarlugu London Miningip ilanngukkusutani ilanngutissavai ilanngukkusinngisatillu ilanngunnagit, tassaavorlu tamanna ajorisarput, SIK-p siulittaasua Jess G. Berthelsen taama isumaqarpoq.
Ove Karl Berthelseniut allakkani ammasuni SIK aamma GA ilaatigut ima allapput:
"SIK peqatigalugu suliniutinut angisuunut atatillugu, inatsisillu suliarineqarneri pillugit annertuumik isornartorsiuisarsimavugut, innersuussutigiinnarsinnaavagut, tusarniaanerni akissuterpassuit nassiunnikuusagut. Uani allakkani tamakku isornartorsiutigut uteqqissanngilagut, taakkumi IBA-nut pingaarutilinnut tunngalluinnarput".
Taamaa periuseqarnermi suna navianarsinnaanersoq, GA-p pisortaa, Brian Buus Pedersen aperaarput.
- Kalaallit Nunaata nioqqutissanik sullissinernilu pilersuinerata tamarmiusup naliganik annerusumik pilersaarut suleqatigiissutiginngikkutsigu, ukiut qulit 15-nillu qaanngiuppata annaasaqaatigiinnassavarput. Taamaattumik isumaqarpunga eqqissilluta IBA-mik isumaqatigiinniut suliarisariaqarlutigu, tassami aningaasarpassuit uani pineqarput, Brian Buus Pedersen taama oqarpoq.
Tassalu tamannarpiaq pillugu GA-p SIK-llu ataatsimoorlutik politikkikkut akisussaasunut miannersoqqusipput.
- Taamaattumik kommuninik suleqateqarnissaq, Ove Karl Berthelsenip suliassaraa pingaaruteqarluinnartoq, Kalaallit Nunaanni Sulisitsisut peqatigiiffiata pisortaa, Brian Buus Pedersen taama oqarpoq.
Aatsitassaqarnermut Naalakkersuisoq, Ove Karl Berthelsen pisumut oqaaseqartissinnaasimanngilarput.
