Futsal-imi arsaattartut Tjekkiamut qaaqqusaasut

Tjekkiamiut futsalimik nunanut allanut unammisartui, EM-mut anngunniunnissamut Serbiami piareersaleruttorput. Kalaallillu nunanut allanut unammisartui, Tjekkiiami ikinngutigiittut unamminissamut jannuarip ulluisa 25-anni 27-annilu pisussami qaaqquneqarput.

-  Nunanut allanut unammisartugut ukioq naallugu sungiusarluarsimasussaapput. Taamaattumik avataanniit soqutigineqarnerput  nuannaarutigaarput, nunat allamiut assigiinngitsut unammiumalluta kissaatigimmassuk, nunanut allanut unammisartut sungiusaasui, Rene Olsen aamma Tekle Ghebrelul,  GBU-p tusagassiuutinut nalunaarutaani taamma allapput.

Tjekkiiamut unammiartornissaq Elite Sport Greenlandimit tapiiffigineqarpoq.   

Kalaallit arsarnermik futsalimik nunanut allanut unammisartut, Tjekkiialiartussat  ataasinngornermi  jannuaarip ulluisa aqqarngani toqqarneqassapput.