Lars-Emil Johansen naalakkersuisunut siulittaasuusimavoq. Aamma Siumumi siulittaasuusimallunilu Folketingimi ilaasortaasimavoq. Taanna ullumikkut soraarninngoreersimavoq – taassumalu kunngikkormiut pillugit eqqaamasani nuannersut oqaluttuarai.

Tamanna uterfigeqqissavarput. Maannakkut ullunik pingasunik uteqqilaassaagut, tassa sapaatiummat ualikkut dronningip tunuarnissani ukiortaamut oqalugiaammini nalunaarutigaa. Naalagaaffeqatigiinnilu tamatsitulli Lars-Emil Johansen tupaallangaatsiarpoq.

Assi © : Scanpix

- Ukiortaamut oqalugiarnermini nalunaarutigissagaa naatsorsuutigisimanngivippara. Akunnaalliliinemrini – immaqa 80-iliinerani imaluunniit siorna ukiunik 50-ni dronningiusimaneranik nalliuttorsiutiginninnermi nalunaaruteqarnissaa takorluukanneraluarpara. Taamali pisoqanngilaq, taanna oqarpoq.

- Illuatungaanili: Dronningi qitimigut suliaritingaatsiarnikuuvoq. Uanga nammineq misilittakkakka malillugit suliaritinnerit annertuut sulerusussusermik annertunerulersitsineq ajortut ilisimavara.

- Kisianni oqaluttuarisaamermi pisoq annertuvoq.

- Tupaallappunga, misigisimavungalu annertuumik pisoqarnerani nalaataqarlunga. Aammalu nammineq paasivara inuusuppallaarunnaarsimallunga dronningi Jens Otto Kragimit suaarutigineqarmat ukiut 52-it matuma siornatigut Københavnimi najuuffigigakku. Maanna tunuarnera aamma takusussanngorpara.

Kunngikkormiut umiarsuaanni nuilarmiut oqaluuserigaat

Lars-Emil Johansen 1991-imit 1997-imut naalakkersuisunut siulittaasuuvoq. Taassumalu dronningi tassani ilikkarpaa, kunngikkormiullu ilaqutariit kunngikkut nunatsinniikkaangata umiarsuaanni angalaqatigisarlugit.

- Arlaanni oqaluttuuppaanga arnat nuilarmiuisa qalipaataat najoqqutaralugit takuneqarsinnaasartoq avannaamiuunersoq kujataamiunersuusorluunniit. Oqarfigigakku taanna uanga naluara tusarnikuunngilara. Oqaluttuuppaanga anaanaga aamma ilisarisimasimagamiuk, aamma pujortaqatigiilluartannguatsiaramiuk taamanikkut, anaanaga cigaavarartortuugami dronningilu cigaritsitorluulluni.

- Taava qularnanngitsumik anaanama oqaluttuussimavaa: Avannaamiut nuilarmiui sapakkanik qaqortortaqarnerusartut kujataamiuninngaanniit. Tassa aput anginerusumik sivisunerusillu takuneqartarmat avannaani. Uangaana illit anaanarnik ilikkakkakka. Oqarfigiinnarpara. "Uanga kalaallisuut nuialarmiui pillugit anaanaga oqaaloqatigineq ajorakku".

Ilisimasaqarluarnera Palle Jerimiassenip aamma maluginiarsimavaa. Palle Jeremiassen Avannaata Kommuniani borgmesteriuvoq, taannalu dronningip nunatta avannaanut tikeraarnerani arlaleriarluni qaaqqusisarsimavoq:

- Asssigiinngitsunik suungaluartunilluunniit eqqartuigaangatta Kalaallit Nunaannut tunngasunik, soorlu Knud Rasmussen imaluunniit Ilulissani eqqaani Sermermiut pillugit ilisimasani itisuut, paasissutissallu uagut ilisimanngisagut tamaasa ilisimasarpai soqutigisarlugillu. Oqaloqatigalugu itisuumik ilisimasaqarneratigut paasisaqarnartarpoq, taanna oqarpoq.

Kunngissaq naalakkersuisullu siulittaasuat ippernanit ornigarneqartut

Maannali dronningiujunnaassaaq. Dronning Margrethep kunngitut atuuffik Kunngissaq Frederimmut januaarip 14-iani tunniutissavaa. Taannalu Kong Frederik den 10.-mik taaguuteqalissaaq.

Kunngissap nulia Mary aamma kunngissaq Frederik 2004-mi Qaanaami. Assi © : Scanpix

Kunngiulluarnissaalu Lars-Emil Johansenip qularutiginngilaa.

- Nunatsinnik soqutigisaqartumik soqutigisaqalernerusinnaasumillu kunngeqalissaagut, taanna oqarpoq.

Ilulissani ippernarpassuit uterfigeqqeriarutsigit.

- Kunngissaq ataasiarlunga angalaqatiginikuuara. Sermersuarmi ilisimatuutut misissuivimmi unnuinikuuvugut. Aasaanerani 25-nik issippoq. Aqaguanilu Ilulissanut ingerlaqqippugut. Timmisartornerput akunnerit pingasut missaanik sivisussuseqarpoq, aqqutaanilu sinilluta. Ilulissani mittarfimmut tikikkatta persuarsiortumik tikilluaqqusisoqarluni erinarsoqatigiinnik appittoqarpoq, inuillu kalaallisoorput borgmesterilu borgmesterip ujamianik ujameqarluni.

- Uagut Frederillu assuutilerluta sanileriippugut – eqqatsinnilu ippernarpassuupput. Taava kunngissap oqarfigaanga: Lars Emil, sooruna ippernat allat qaangiinnarlugit uagutsinnukaaginnartut Taava oqarfigivara: Allat ullaaq uffarnikuusimassapput.

- Tamanna nuannaraa.

- Nunatsinnut asannittumik tatiginarluartumillu kunngeqalissaagut, Lars-Emil Johansen oqarpoq.