Tupaallannarlunilu tupannarpoq.

Dronningip ukiortaamut oqalugiaateqarnermini tunuarnissaminik nalunaaruteqarneranit ullut marluk qaangiuttut Nuummi inuit naapitat taama qisuariaateqarput.

- Tupaallalaartorujussuuvunga, Mette Rasmussen Larsen KNR-imut oqarpoq.

Tassungalu pissutissaqarluarpoq. Danskimmi kunngikkormiuini ukiuni 900-ngajanni nammineerluni tunuarniartoqarnikuunngilaq. Atuuttup toqunerata kingorna nalinginnaasumik aatsaat nikittoqartaraluarpoq.

Dronning Margrethe 2023-p ingerlanerani qitimigut suliaritippoq, tamatumalu kingunerisaanik akisussaaffiup kinguaariit tulliinut ingerlateqqinnissaanut piffissanngornersoq isumaliutiginnilersimalluni, ukiortaamut oqalugiaammini oqarpoq. Taamaammat januaarip 14-ianit tunuarluni atuuffini kunngissamut Kong Frederik d. 10.-mik taaguuteqalertussamut tunniutissavaa.

Mette Rasmussen Larsen. Foto: Johannes Olsen/ KNR Assi © : KNR

- Sunniuteqangaatsiarnikuuvoq. Kunngikkormiut nunatsinniikkaangata amerlasuut kunngikkormiunik nuannarinnittut malunnartarpoq. Taamaammat kunngikkormiut tikeraaraangata uagutsinnut nalliuttorsiutaasarpoq. Kisianni kunnginngortussaq aamma soqutigineqartorujussuuvoq, Mette Rasmussen Larsen oqarpoq.

- Droninngi assingiinngitsorpassuarnik soqutiginaquteqarpoq, pujortanngersuuvoq. Eqqumiittuliortuulluni taavalu aamma qanganisarsiuut arkæologimik soqutisaqartuulluni sorpassuupput soorlu eqqaasinnaasagut dronninngimut tunngatillugu.

Múte B. Egede maanna aamma qujassuteqartoq

Naalakkersuisut siulittaasuat, Múte B. Egede (IA) KNR TV-kkut ippassaq unnukkut nalunaaqutaq unnukkut arfineq-pingasunut ukiortaami toqqaannartumik oqalugiarpoq. Taassuma dronningi ataasinnguamilluunniit eqqaanngilaa. Aatsaat ullumi nalunaaqutaq ataasinngunngitsiartoq – dronningip nalunaaruteqarnerata kingorna ullut marlungajaat qaangiuttut – Siulittaasup Naalakkersuisoqarfianit naatsumik nalunaaruteqartoqarpoq:

- Naalakkersuisut nunatsinnilu innuttaasut sinnerlugit Ataqqinartorsuup Dronning Margrethep aappaat ukiuni 52-ini dronningiusimaneranut qujarusuppugut, nunatsinnullu soqutiginnilluarsimaneranut aallussilluarsimaneranullu qujarusulluta. Dronning Margrethe kalaalerpassuarnik ataqqineqarlunilu nuannarineqarpoq. Kiisalu aamma Kunngissaq Frederik kunnginngulernerani pilluaqqorusuppara, Naalakkersuisut Siulittaasuat Múte Bourup Egede nalunaarummi oqarpoq.

Dronning nunatsinnik kalaallinullu nuannarinnittuusoq

Nuummi naapitatsinnut uteqqeriarutta Abel Lennertip nutaarsiassaq tusaramiuk tupaallaatigaa. Taassumali dronning paasisinnaalluarlugu oqarpoq:

- Aappaatigut tupalaarpunga kisianni aamma paasilluarsinnaavara, peqqippiarunnaarami pangallangajattalerlunilu. Inuppalaarnera kalaallinut nuannarinnittuunera. Qujanarujussuaq pereersunut ajunnginnerpaanillu kissaappara.

Johannes Olsen/ KNR Assi © : KNR

Hans Otto Sommerip dronningip nunatsinnut asannilluinnartuuneranik aamma eqqaamaniarpaa:

- Nunatsinnut asannittuullunilu kalaallinut ataqqinnittuummat nuannaartorivara, taanna oqarpoq.