Franskit nunanut allanut ministeriata brexitip kingorna akiuussutaartoqarnissaa ilimagigaa

Franskit nunanut allanut tunngasunut ministeriata, Jean-Yves Le Drianip, tuluit EU-mi ilaasortaajunnaarnerminni niuernermut isumaqatigiinniarnikkut ilungersunartorsiungaatsiarsinnaanissaannik, nunallu taakku marluk kimmaatilersinnaanerannik aarlerisaarpai.

Franskit nunanut allanut ministeriata oqarnera naapertorlugu Tuluit Nunaat ukiup naannginnerani killilersugaanngitsumik niueqatigiissinnaanermik isumaqatiginninniarnissaminut ilungersunartorsiussaaq.

- Illuatungeriit niueqatigiinnissamut siunissamilu atassuteqarnissaminnut isumaqatigiinniarnerminni akerleriinnissaat ilimagaara. Immitsinnut kimmaatissaagut, Frankrigimi præsidentip Emmanuel Macronip qanimut peqatigisaa, Le Drian, oqarpoq.

AAMMA ATUARUK EU tulunnut: Aalisarneqartinnagu niuernermik isumaqatigiissuteqarfigissanngilassi

Taanna franskit naalakkersuisuini qaffasissumi sinniisut akornanni isumaqatigiinniarnissat ilungersunarnissaannik kingulliulluni aarlerisaarisuuvoq.

Isumaqatigiinniarnerit qaammatip tulliani aatsaat aallartinneqarnissaat naatsorsuutigineqarpoq, tuluilli aningaasaateqarnermik suliffeqarfissui EU-mut brexitip kingornatigut atassuteqarnissaannut malittarisassanut atatillugu apeqqummut Tuluit Nunaat EU-lu imminnut ungasissorujussuulereerput.

- Isumaqatigiinniarnerilli taamaattarput. Tamat soqutigisatik illersorniartarpaat, Le Drian oqarpoq, nangillunilu:

- Tuluit Nunaata EU pisortatigoortumik sapaatit-akunneri marluk matuma siorna qimappaa, taamaakkaluartorli ikaarsaariarnissamut, ukiup naanissaata tungaanut ilaasortatut suli niueqatiginnilluni.

AAMMA ATUARUK Aviisi Brexit pillugu: Kalaallit Nunaannut kinguneqarallartussaanngilaq

EU-mi nunat 27-it sinneruttut isumaqatigiinniarnissamut aallarnisarnerminni inissisimaffilerniarsaripput, pingaartumik Frankrigip ilaatigut aalisarnermut isumaqatigiinniarnissanut ajornakusoortunut - piumasaqaatini malunnartinniarsarai.

Frankrig EU-milu nunat allat - matumani Danmark ilanngullugu - tuluit imartaanni aalisartaannarusupput. Tuluit nammineq naalakkersuisoqarneq tamakkiisoq europamiunullu aalisartunut killeqartitsinissaq kisaatigaat.

Tuluit ministeriunerata, Boris Johnsonip EU-mut isumaqatigiissutip inissinnissaanut imminut qaammatinik aqqanilinnik periarfissippoq, naak isumaqatigiinniarnerit imaannaanngitsut pillugit piffissakippallaarnissaq pillugu mianersoqqussuteqarfigineqareeraluarluni.

Tuluit naalakkersuisuisa siulittaasuata tuluit illersornissaq sillimaniarnerlu pillugit EU-mut suleqatiginnittuaannarnissaat oqaatiginikuuaa.