Isummat akerleriittut Kuannersuit pillugit innuttaasunut ataatsimiititsinermi siullermi naapittut
Suliniut inuiaqatigiinni assortuussutaaqisoq pillugu alloriarnerit ilaat ullumikkut pisussanngorpoq. Kuannersuarnimi aatsitassarsiortoqarsinnaanera pillugu innuttaasunik ataatsimiititsinerit ullumimit pissapput.
Narsarsarsuarmi unnugu ataatsimiititsisoqaqqaassaaq, innuttaasut qilanaaput, aatsitassarsiorusuttullu Greenland Mineralsikkut ataatsimiititsinerit periarfissatsialaasoraat.
Kuannersuarni aatsitassarsiorfik pillugu paasissutissat piviusut:
- Kuannersuit Narsap kilometerinik 7,5-inik ungasitsigisumi avannarpasissortaaniippoq.
- Aatsitassarsiorfik asimi 700 meterinik qutsitsigisumiipppoq.
- Greenland Mineralsip aatsitassarsiorfk ukiuni 37-ni piiaaffiginiarpaa.
- Aatsitassarsiorfiup piiaaffigineqarnerani nunaqavissunik 328-nik suliffissaqartitsisoqarsinnaassasoq naatsorsuutigineqarpoq.
- Aatsitassarsiorfik qaqutigoortunik ilaatigut uranimik thoriumimillu saffiugassaqarpoq.
- Aatsitassarsiorfik saffiugassiassamik ukiumut millionit tonsit pingasut missaannik piiaaffiusassaaq.
- Ukiuni 37-ni aatsitassarsiornermit sinnikut 111 millionit tonsiussapput qaarsorlu (qaarsumit piiarneqartumit sinnikut ) 111 millionit tonsiussalluni.
Tusarfik: Pinngortitaleriffik aamma Nationalt Center for Miljø og Energi, IPN-iliaq.
- Innuttaasut immaqa suliniummut akuersaanngitsut oqaloqatiginerini suut isiginiarneqarneri annilaangatigineqarnerilu paasiniarluarnissaanut periarfissaavoq.
Greenland Mineralsimi pisortaq, John Mair KNR-imut taama oqarpoq.
Narsarsuarmi najugalik suliniummullu tapersersuinngitsoq, Uraani Naamimut ilaasortaq, peqatigiiffilli sinnerlugu isumminngitsoq illuatungeriit tamarmik peqataanissaat kissaatigaa.
- Greenland Mineralsimit Namminersorlutillu Oqartussanit atorfilittat tusarnaarluarsinnaallutik takkunnissaat neriuutigaara. Aamma innuttaasut tamarmik takkunnissaat ammasumillu isumassarsiaminnik, eqqarsaatimminik annilaanngatiminnillu oqarnissaat neriuutigaara. Akuersaaraanni akerliungaanniluunniit.
Inga Gisladottir KNR-imut oqarpoq.
Innuttaasulli ilaat, suliniummut akuersaartoq aatsitassarsiorsinnaanissamut naaggaartut tusaaqqusaarnissaat annilaangatigaa.
- Kuannersuarni aatsitassarsiornissamut akuersaartutut ataatsimiinnerup tukattumik ingerlanissaa annilaangatigaara. Ukua naaggaartut avaallattarnissaat tusaaqqusaarnissaallu soorunami annilaangatigaara taannartaa.
John Knud Høegh Olsen taama oqarpoq, taannali unnugumut pilerisuppoq.
- Takkutissuunga imaassinnaavoq aniinnartungaluunniit. Uanga isinnik torinngitsumik tukattumik ingerlanneqalerpat anissuunga.
Aqagu arfininngornermi Qassiarsummi, sapaatiuppat Igalikumi, ataasinngorpat Qaqortumi marlunngorpallu Narsami aamma ataatsimiititsisoqassassaaq.
Qaqortumi Narsamilu ullormut marloriarluni ataatsimiititsisoqassaaq. Siullermik ualikkut nalunaaqutaq marlunut aappassaanillu unnukkut arfineq-marlunut.
KNR TV-p Qaqortumi Narsamilu ataatsimiititsinerit toqqaannartumik aallakaatissavai.
