Kinamiut ilisimatuutut misissuiviliornissaat akornutissartaqanngilaq
Kalaallit Nunaata ilisimatusarnermut suliassaqarfik akisussaaffigaa taamaalillunilu Kinap nunami ilisimatuutut misissuivimmik pilersitsinissaanut akuersisinnaalluni. Søren Espersenip paragraf 20 naapertorlugu apeqqutaanut Danmarkimi nunanut allanut tunngasunut ministeri, Anders Samuelsen, taama akissuteqarpoq.
Dansk Folkepartiip Kalaallit Nunaannut tunngasunut oqaaseqartartua apeqquteqaateqarnermini paaserusuppaa nunanut allanut tunngasunut ministerip Kinap nunatsinni ilisimatuutut misissuivimmik ataavartussamik pilersaarutai, ataatsimeersuarnermi Arctic Circlemi Islandimi pisumi saqqummiunneqartut qanoq isumaqarfiginerai.
Aamma danskit naalagaaffiata naggataagut tamatumunnga inaarutaasumik akuersissuteqarnissaa nunanut allanut tunngasunut ministerimut uppernarsaqquaa.
AAMMA ATUARUK Kinamiut nunatsinni misissuiffimmik pilersitserusuttut
Anders Samuelsenilli akissuteqarluni naqissuserpaa suliassaqarfik pineqartoq Kalaallit Nunaata oqartussaaffigigaa, Kalaallit Nunaatalu ilisimatuutut misissuivik pineqartoq pillugu Kinamut nammineerluni isumaqatigiinniarnera namminersorneq pillugu inatsit malillugu akornutissaqanngitsoq.
Danskilli nunanut allanut tunngasunut ministeriata aamma erseqqissaatigaa Kinalu siunnerfigisamik nalunaaruteqartoqarnissaa sioqqullugu Naalakkersuisut oqaloqatigineqarsimasut.
Aammattaaq danskit nunanut allanut tunngasunut ministereqarfiata suliniutaasoq pillugu ingerlaavartumik ilisimatinneqartarnera oqaatigaa.
Taamaammat aamma kunngeqarfiup nunanut allanut, sillimaniarnermut illersornissamullu politikkikkut soqutigisaanut naapertuuttuunissaa qularutigineqanngitsoq, danskit nunanut allanut tunngasunut ministeriat Søren Espersenimut akissutimini taama allappoq.
