Ataatsimeersuarnerup soqutigineqarluarnera siulittaasup killitsissutigigaa
![](/sites/default/files/styles/image_934x467/public/article_images/img_5648.jpg?itok=_l9-W5-Z)
Danskit autismeqartut peqatigiiffiat Nunatsinni siorna septembarip qaammataani immikkoortortaqalermat, nunatsinni inoqatinut attaveqarniarnermik ajornakusoortitsisut ataatsimoorussamik oqaaseqarsinnaalerput.
Taakkuttaaq ataatsimeersuarnermik aaqqissuussisuupput.
- Aqqusaagassat imaannaanngillat. Aammaakua misigissutsitigut sakkortujusut, danskit inoqatinut attaveqarniarnermik ajornakusoortitsisut peqatigiiffiata Nunatsinni immikkoortortaqarfiani siulittaasoq, Karsten Høy, oqarpoq.
AAMMA ATUARUK Laila prinsesse Mariemit pulaarneqartoq
Taanna infantil autismertumik erneqarami unammilligassat imaannaanngitsut ilisimalluarpai, autismilu pillugu ataatsimeersuaartitsinissaq ukiup affaani sulissutigisimavaa.
- Nunatsinni autisme pillugu ilisimaneqarnerulernissaq anguniakkatta pingaarnersaraat, aammalu maanna atugassarititaasut sammineqarnerulernissaat anguniarlugu, Karsten Høy oqarpoq nangillunilu:
- Aammami innarluutillit kisimik pineqanngillat. Angajoqqaat, qatanngutaasut qanigisaasullu allat aamma pineqarput, Inuit 100-it missaanniittut ataatsimeersuaarnermi peqataanissaat neriuutaasimavoq, soqutiginninnerli ilimagisamit anginerusimavoq, peqataasussammi 180-it pallippaat.
Ataatsimeersuareernermi nalilersorneqassaaq, ataatsimeersuarnermilu tusakkat akissutissarsiniarneqarnissaat Karsten Høyip naatsorsuutigaa, taakkulu allattorneqassapput.
- Ilungersuutissaq tassaapput, ullumikkut atugaasut pitsanngorsarnissaat, suullu pisariaqaataanersut paasiniarnissaat, taakkulu pitsanngorsariniarnissaat. Tassaassapput tamaviaannartussaq, Peqatigiiffiup illersuisuattut Kunngikkormiutut ataqqinassusilik Prinsesse Marie ataatsimeersuarnermi peqataassaaq, saniatigullu aamma Naalakkersuisunut ilaasortat arlallit peqataassapput.
AAMMA ATUARUK Prinsesse Marie Nuummi ataatsimeersuarnermik ammaalersoq
Politikkikkullu soqutiginnittoqarnera Karsten Høyimut nuannaarutigaa.
- Naalakkersuisunit tapersersorneqarnerpiut tulluusimaarutigeqaarput. Taava qanoq ikkumaarnersut takussavarput soqutiginnittuartinniarumaarlugillu. Taannami aalajangiisuussaaq, Danskit inoqatinut attaveqarniarnermik ajornakusoortitsisut peqatigiiffiata Nunatsinni immikkoortortaqarfiani siulittaasoq, Karsten Høy, oqarpoq.