Knuth: Ataatsimiititaliami pissutsit maanna allaanerupput
Nunatta 2009-mi namminersornerulernerata kingorna, Folketingimi ataatsimiititaliap oqaluuserisartagaat, naalagaaffeqatigiinnermut attuumassuteqarnerusartut tassaalersimapput, nunat allat pillugit politikki aamma illersornissamut sillimaniarnermullu politikki.
- Aalajangigassammi kalaallinut tunngasut tamarmik Namminersorlutik Oqartussanut tunniunneqareerput. Taamaammat ataatsimiititaliaq ullumikkut 2009-miit allaaneruvoq, taamanikkut kalaallinut tunngasut amerlanerusut oqallisigineqartarlutik. Taamaammat siulittaasuuneq paarlakaanneqartarsinnaappat paasinartippara. Kisianni siulittaasup tulliata Kalaallit Nunaanni qinigaasuunissaa, uannut pingaartuuvoq, aammalu suleqatigiinnerup pitsaanerpaanissaanut uanga pisinnaasakka tamaasa iliuuseqassaanga, Nunarput pillugu ataatsimiititaliami siulittaasunngortoq, Marcus Knuth oqarpoq, ilanngullugulu oqarluni, nammineq siulittaasunngornerminut aalajangeeqataanani.
Folketingimi Kalaallit Nunaat pillugu ataatsimiititaliaata qallunaamik siulittaasortaarnera Inuit Ataqatigiit sinnerlugu Folketingimut ilaasortamit, Aaja Chemnitz Larsenimit sakkortuumik isornartorsiorneqarpoq, ilaatigut naalagaaniartoqartumik oqarluni.
Danmarkip iluani pissutsinut politikkimi taaseqataannginnissamut partiit talerperliit piumasaannut akuersisimasuuguni, Aaja Chemnitz Larsen nammineerluni ataatsimiititaliami siulittaasunngorsinnaagaluarpoq.
Aaja Chemnitz Larsenili taamaaserusussimanngilaq.
Venstrep politikkikkut oqaaseqartartuata, Jakob Ellemann- Jensenip siulittaasunngortitsinermi periutsit ajortussaqartinngilai.
IA-p partiit saamerliusutut taasisannginnissaa qulakkeersinnaasuugaluarunikku, Aaja Chemnitz Larsen ataatsimiititaliami siulittaasunngorsinnaagaluartoq, Jakob Ellemann Jensen, Politiken.dk-mut oqarpoq.
Kalaallit Nunaat pillugu ataatsimiititaliami siulittaasup Nunatsinnut pingaarutillit qaqittartussaassammagit, Aaja Chemnitz Larsen Nunatsinneersumik siulittaasoqannginneq pissutigalugu ataatsimiititaliap sanngiinnerulersinnaaneranik ernumassuteqarpoq.
Nunattali Folketingimut ilaasortaasa oqaluuserisassat pillugit sunniilluartarumaartut, Marcus Knuth neriorsuivoq.
- Ataatsimiisitaliaq ataatsimoorluni aalajangiisarpoq. Oqaluuserisassamilli qaqitsisoqaleraangat, Kalaallit Nunaannit Folketingimut ilaasortat ilaatittassavakka. Tamanna pissusissamisoorpoq. Kalaallit Nunaanit oqaluuserineqarusuttut aamma qaqinneqartarnissai, siulittaasutut qulakkeersinnaassallugit neriuutigaara, Marcus Knuth oqarpoq.
Siulittaasunngortoq nammineq suliarerusutaminik aamma saqqummiussivoq.
- Suliarerusutakka arlaqarput, soorlu Pituffimmut tunngasoq. Kisianni inuussutissarsiornermi suleqatigiinnerput sammissallugu soqutiginarpoq. Danmarkip suliffeqarfiit Kalaallit Nunaanniittut aningaasaleeqataassutinut qanoq ililluni ammaanniarsinnaavai, taamaasinikkullu suliffinnik pilersitsilluni, suliffeqarfiillu isertitai amerlisillugit. Taanna ukkatarissagipput, uanga ilimagaara. Oqaluuserisassalli Kalaallit Nunaannit qinikkat peqatigalugit ingerlanneqartassapput, Kalaallit Nunaat pillugu Folketingemi ataatsimiititaliami siulittaasunngortoq, Marcus Knuth, oqarpoq.
