IKIORTARIALLIT Siulittaasoq: Atornerlugaasimanerminnik kingunerlutsitsisut danskinit ikiorneqartariaqarput

Danmarkimi inuuniarnikkut ajornartorsiortunut siunnersuisoqatigiit siulittaasuata isumaginninnermut ministeri kajumissaarpaa siunertamut aningaasanik immikkoortitseqqullugu.

Taama kajumissaarivoq nalunaarusiap takutimmagu, kalaallit arnat Danmarkimi inuuniarnikkut ajornartorsiortut arlallit unnuiffissaqarumallutik atoqateqartariaqartarmata.

Kalaallit Danmarkimiittut Kalaallit Nunaanni kinguaassiutitigut kanngutsaatsuliorfigineqarnermik kingunerlutitsisut ikiorneqarnissaat danskit akisussaaffigaat.

Aamma atuaruk Nalunaarusiaq: Kinguaassiutitigut atornerlugaareersimanertik erloqissutigisaraat

Danmarkimi inuuniarnikkut ajornartorsiortunut siunnersuisoqatigiit siulittaasuat Jann Sjursen taama oqarpoq.

- Kalaallit Danmarkimut nuuttartut tikeqqaarnerminniit ikiorneqartarnissaat Folketingimit naalakkersuisunillu nassuerutigineqartariaqarpoq. Minnerunngitsumik inuuniarnikkut ajornartorsiuteqarluni Danmarkimut nuukkaanni. Uani kanngutsaatsuliorfigineqarsimaneq assigisaallu eqqarsaatigalugit, ikiorserneqarnissaq pisariaqarluinnarpoq, Sjursen oqarpoq.

Danmarkimi inuuniarnikkut ajornartorsiortunut siunnersuisoqatigiit nalunaarusiaata ersersippaa, kalaallit arnat inuuniarnikkut ajornartorsiortut Danmarkimiittut arlallit unnuiffissaqarumallutik atoqateqartariaqartartut. Amerlasuutigut angummi ilisarisimasamik akornanniittumi. Arnammi kommunip ikiorsiisinnaaneranut malittarisassat paasisinnaanngilaat angusinnaanangilluunniit.

Aamma atuaruk Kalaallit arnat Danmarkimiittut ajornartorsiutaat ataatsimiissutigileraat

Arnat arlallit ajoqutaannut aamma ilaasarput kinguaassiutitigut kanngutsaatsuliorfigineqarsimanitik kingunerlutsittarmatigit.

- Tamanna ajorluinnarpoq, ajornartorsiutillu annerulersittarlugit. Nalunaarusiamilu atuarsinnaasatsitut Danmarkimi arnat atornerlunneqaqqiinnartarput, tamannalu eqqarsaatigiinnarluguluuniit artornangajappoq, Jan Sjursen oqarpoq.

Taamaattumik danskit naalagaaffiat kalaallinut atornerlunneqarsimasunut Danmarkimi atugarliortunut nutaamik suliniuteqartariaqartoq, Jann Sjursen isumaqarpoq.

- Ilaatigut immikkorluinnaq iliuuseqarnerussammat isumaqarpunga suliniut immikkut aningaasalerneqartariaqartoq. Oqarusuppungalu suliniuteqarnissaq pisariaqarluinnartuusoq, Jan Sjursen oqarpoq. 

Christiansborgimi ullumi ataatsimeersuarnermi nalunaarusiaq ilaatigut Inuit Ataqatigiinneersup Aaja Chemnitz Larsenip isumaginninnermullu ministerip Karen Ellemannip peqataaffigisaanik oqallissutigneqassaaq.