Danmarkimi kalaallit meerartaannut isummanik pigiliutiinnakkanik isiginnittarneq filmiliarineqarpoq
Filmelianik naatsunik marlunnik filmeliortoqarpoq, peqatigiiffimmiillu neriuutigineqarpoq kalaallit meerartaannut inussuttaannullu marloqiusamik isiginnittarneq ajortumillu kinguneqartitsisarneq pillugu ammasumik oqallisigineqarumaartoq.
Kalaallit meerartaat inuusuttullu Danmarkimut nuunnerminni isummanik pigiliutiinnakkanik qallunaanit isigineqartarput.
Taamaatumik peqatigiiffik Foreningen Grønlandske Børn filmelianik naatsunik marlunnik filmiliortitsivoq isummat pigiliutiinnakkat tamassumalu oqallisigineqarnissaa siunertaralugu.
Kalaallit Danmarkimut nuunnerminni aqqusaagaat misigisaat tamakkualu qanoq kinguneqartarnersut oqaluttuariniarpagut, Puk Draiby peqatigiiffimmi Foreningen Grønlandske Børnimi siulittaasoq oqarpoq.
Puk Draibyp neriutigaa, pingaartumik kalaallit meerartaannik sulissisut, perorsaasut ilinniartitsisut immikkullu ilinniarsimallutik sulisut, filmeliat taakkua marluk isiginnaarumaaraat, taamaalillutik kalaallit meerartaannik pigiuliutiinnakkanik isummersorfigineqartarsimasunik malussarniarnerussamata.
Aamma atuaruk Kalaallit-meerartaannik-suliniuteqartoq-millionit-affaanik-tapiiffigineqarpoq
- Kalaalerpassuit isummanik pigiliuutiinnakkanik isummerfigineqartarput kalaallillu pillugit assigiinngitsunik isiginnittariaaseqarneq kalaallinit naalaanneqartarluni.
Pingaaruteqarpoq nipituumik oqaatigineqarnissaa oqallittoqarluni tamannalu pillugu oqaloqatigiittoqarluni, Puk Draiby oqarpoq, taassuma erseqqissaatigaa ajornartorsiutigineqartut pillugit kalaallit meerartaasa tamarmik nalaanneq ajoraat.
Tamannali nalaanneqarajuppoq, filmeliami inuusuttut arlaqartut ulluinnarni atukkatik pillugit oqaluttuarput, qallunaat pigiliutiinnaakkaminnik isummersortarnerannit ajuallatsinneqarsimasunik.
Isummannik pigiliuutiinnakkanik qallunaat isiginnittarnerat qallunaat Kalaallit Nunaat pillugit ilisimasakinnerannik Puk Draibyp pissutaasoraa.
Kalaallit Nunaat atuarfinni oqaluttuarineqarpallaartanngilaq, aamma kalaallit danmarkimiittut ima amerlatiginngillat Danmarkimi kikkut tamarmik kalaallit nunaannerersunik ilisarisimasaqarlutik tassuunatigut isummanik pigiliutiinnakkanik isiginnartarneq atuutiinnarpoq.
Peqatigiiffimmi Foreningen Grønlanske Børnimi siulittaasoq Puk Draby KNR-imut oqarpoq
Filmeliat naatsut marluk peqatigiiffiup Foreningen Grønlandske Børnip nittartagaani www.fgb.dk-mi takuneqarsinnaapput.
