Folketingip Kalaallit Nunaannut ataatsimiititaa tikeraalerpoq
Tikeraat Tunumeeqqaassapput. Ataatsimiititami ilaasortat ullumi Kulusummut tikipput Tasiilamullu ingerlaqqissallutik. Kalaallit Nunaannut ataatsimiititami ilaasortat Kulusup oqaluffia atuarfialu takusassavaat taakkununngalu attuumassutillit oqaloqatigissallugit. Kingorna Tasiilamut Kuummiunullu ingerlaqqissapput. Ataatsimiititami ilaasortat pineqaatissinneqarsimasunut inissiisarfik eqqartuussivillu alakkassavaat eqqartuussinermilu aaqqissuusseqqinnermut tunngasut sammissallugit.
-Ataatsimiititani ilaasortat, minnerunngitsumik qallunaat politikeriisa, Kalaallit Kalaallit Nunaannut angalasarnerat pingaaruteqartupilussuuvoq. Nunaqarfinni innuttasut kommunefogedillu unammilligassaat Danmarkimiiginnarlutik takorlooruminaatsittassagamikku aatsaat namminneq takullugit paasisaqarfigisarpaat, Kalaallit Nunaannut ataatsimiititami siulittaasup tullia, Doris Jakobsen (Siumut) oqarpoq.
Angalaqatigiit pingasunngorpat Nuummukarunik rigsombudsmandi ataatsimeeqatigissavaat, pineqaatissinneqarsimasunik inissiisarfik allakkarlugulu Aatsitassanut Pisortaqarfimmi oqaloqatiginnikkiartussapput. Sisamanngorpat Inatsisartut Naalakkersuisullu ataatsimeeqatigisariarlugit tallimanngorpallu Kangerlussuarmi tikeraariarlutik angalaqatigiit Danmarkimut utissapput.
-Kalaalllit Nunaata unammilligassai pillugit isummersinnaassagutta Kalaallit Nunaanni pissutsit pillugit paasissutissinneqartarnerput pingaarutilipilussuuvoq. Nunami maani aatsitassat qaqutigoortut nassaassaasut eqqarsaatiginerullugit taamatut oqarpunga. Taakkunannga qallueqataarusuttut nunat amerlaqaat. Uran piiarneqarsinnaasoq aamma isummersinnaasariaqarpugut, taakkualu saniatigut eqqartuussiveqarfimmi nutarterinissaq pillugu ilaasortaqatima oqaloqatiginissaat qilanaaraara, ukiorpassuarni Kalaallit Nunaannut ataatsimiititami ilaasortaasimasoq, Kim Andersen (Venstre) knr.gl-imut oqarpoq.
